(ភ្នំពេញ)៖ គណៈសង្ឃនាយក នៃព្រះរាជាណាចក្រកម្ពុជា នៅថ្ងៃទី០៨ ខែមករា ឆ្នាំ២០២១នេះ បានរៀបចំកម្មវិធីប្រគល់គោរម្យ៍ងារ ជូនពុទ្ធសាសនិកជន ដើម្បីជាការលើកទឹកចិត្ដ ក្នុងការបន្ដជួយជ្រោមជ្រែងបន្ថែមទៀត នៅក្នុងវិស័យពុទ្ធសាសនា។
កម្មវិធីនេះ ធ្វើឡើងក្រោមព្រះរាជធិបតីភាព សម្ដេចព្រះមហាសុមេធាធិបតី កិត្ដិឧទ្ទេសបណ្ឌិត នន្ទ ង៉ែត សម្ដេចព្រះសង្ឃនាយក នៃព្រះរាជាណាចក្រកម្ពុជា នៅសាលសន្និសីទចតុមុខ ខណ្ឌដូនពេញ រាជធានីភ្នំពេញ។
ក្នុងពិធីនេះ ក៏មានការយាងនិមត្ដ ពីសម្ដេចព្រះមហាសង្ឃរាជ សម្ដេចព្រះសង្ឃនាយក សម្ដេចព្រះសង្ឃនាយករង និងសម្ដេចព្រះសង្ឃគ្រប់ព្រះអង្គ និងមានការចូលរួម ពីលោក ឈិត សុខុន រដ្ឋមន្ដ្រីក្រសួងធម្មការ និងសាសនា ផងដែរ។
សម្ដេចព្រះឧត្ដមចរិយា បណ្ឌិត ឈឹង ប៊ុនឈា ព្រះអនុប្រធានថេរសភាពុទ្ធសាសនា ព្រះអគ្គាធិការរងពុទ្ធិកសិក្សាជាតិ និងជាព្រះថៅអធិការវត្ដវិមានតេជះ ហៅស្រះច្រក បានអានសេចក្ដីសម្រេច និងព្រះរាជប្រកាសនីយប័ត្រតែងតាំង ទីប្រឹក្សា និងគោរម៍្យងារ ជាអគ្គមហាឧបាសិកា មហាឧបាសក និងមហាឧបាសិកា ពុទ្ធសាសនូបត្ថម្ភក៍។
បន្ទាប់ពីបានអាន សេចក្ដីសម្រេច និងព្រះរាជប្រកាសនីយប័ត្រតែងតាំង ទីប្រឹក្សា និងគោរម៍្យងារ ជាអគ្គមហាឧបាសិកា មហាឧបាសក និងមហាឧបាសិកា ពុទ្ធសាសនូបត្ថម្ភក៍ រួចមក សម្ដេចព្រះសង្ឃនាយក ព្រះរាជទានប្រកាសនីយប័ត្រ ជូនពុទ្ធសាសនិកជន។
ក្រោយមក ក៏រៀបចំពិធីជយន្ដោជូនអគ្គមហាឧបាសិកា មហាឧបាសក និងមហាឧបាសិការ ពុទ្ធសាសនូបត្ថម្ភក៍ និងភ្ញៀវកិត្ដិយសចូលរួម និងរៀបចំពិធីថ្វាយ-ប្រគេន វត្ថុទានចំពោះ សម្ដេចព្រះមហាសង្ឃរាជ សម្ដេចព្រះសង្ឃនាយក សម្ដេចព្រះសង្ឃនាយករង និងសម្ដេចព្រះសង្ឃគ្រប់ព្រះអង្គ។ បន្ទាប់មក ផ្សាយមេត្ដាធម៌បញ្ចប់កម្មវិធី៕
