(ភ្នំពេញ)៖ ដើម្បីជួយសម្រួលក្នុងជីវភាពរស់នៅប្រចាំថ្ងៃរបស់ព្រឹទ្ធាចារ្យចាបុីដងវែង ពីររូប លោកព្រឹទ្ធាចារ្យ កោសល្យវោហារ គង់ ណៃ និងលោកតា នេត ប៉េ ដែលមានសុខភាពកាន់តែជរានោះ សម្តេចតេជោ និងសម្តេចកិត្តិព្រឹទ្ធបណ្ឌិត បានចាត់ឱ្យក្រុមការងារមនុស្សធម៌នាំអំណោយជូនលោកព្រឹទ្ធាចារ្យទាំងពីរ។
នៅព្រឹកថ្ងៃទី៣០ ខែធ្នូ ឆ្នាំ២០២០ លោក ជិន ប៊ុនធឿន បានដឹកនាំក្រុមការងារយកអំណោយប្រចាំឆ្នាំទៅផ្តល់ជូនលោកព្រឹទ្ធាចារ្យ កោសល្យវោហារ គង់ ណៃ សព្វថ្ងៃលោក មានអាយុ ៧៥ឆ្នាំ រស់នៅភូមិដូង ឃុំស្វាយទង ខាងជើង ស្រុកកំពង់ត្រាច ខេត្តកំពត។
នៅរសៀលថ្ងៃដដែលក្រុមការងារបានបន្តនាំយកអំណោយរបស់សម្តេចទាំងពីរទៅប្រគល់ជូនលោកតា នេត ប៉េ ព្រឹទ្ធាចារ្យចាប៉ីដងវែងដ៏ល្បីល្បាញ មានអាយុ ៦៤ឆ្នាំ រស់នៅភូមិស្រះកែវ ឃុំក្រាំងស្វាយ ស្រុកព្រះស្តេច ខេត្តព្រៃវែង។
អំណោយដែលត្រូវផ្តល់ជូនលោកព្រឹទ្ធាចារ្យទាំងពីររួមមាន៖
គ្រឿងឧបភោគ-បរិភោគ និងសម្ភារប្រើប្រាស់ក្នុងផ្ទះ១ឈុតធំ និងថវិកាចំនួន ១២០០ដុល្លារ ជាថវិកាឧបត្ថម្ភប្រចាំឆ្នាំ គឺចាប់តាំងពីឆ្នាំ២០០៧ រហូតដល់បច្ចុប្បន្ន។
លោកតាព្រឹទ្ធាចារ្យបានសម្តែងនូវកី្តរំភើបក្រៃលែង និងថ្លែងអំណរគុណចំពោះសម្តេចទាំងទ្វេដែលតែងតែយកចិត្តទុកដាក់រាល់ការលំបាករបស់ពួកគាត់ និងប្រជាពលរដ្ឋគ្រប់ទីកន្លែង។
លោកតាបានជូនពរសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារឱ្យមានសុខភាពល្អពេញបរិបូរណ៌ដើម្បីដឹកនាំប្រទេសជាតិអោយកាន់តែរីកចំរើនបន្តទៅទៀត ។
សូមបញ្ជាក់ថា ដោយសារកត្តាសុខភាពរបស់ព្រឹទ្ធាចារ្យទាំងពីរកាន់តែទ្រុឌទ្រោម និងពិការភ្នែកមិនអាចមើលអ្វីឃើញពិបាកក្នុងការធ្វើដំណើរផងនោះ ធ្វើអោយលោកមិនអាចប្រកបរបរដេញចាប៉ីដងវែងដើម្បីរកប្រាក់ ចំណូលមកចិញ្ចឹមជីវភាពប្រចាំថ្ងៃដូចមុនទៀតបានឡើយ៕
