(ភ្នំពញ)៖ តំណាងអតីតនិស្សិតអាហារូបករណ៍ ប្រទេសបារាំង (Ancien Boursiers de France) ហៅកាត់ថា «ក្រុម ABF» នាំយកថវិកាប្រគល់ជូនលោក សេង ទៀង ចំនួន១០០លានរៀល ដែលអតីតនិស្សិតអាហារូបករណ៍ប្រទេសបារាំង ចំនួន៦៦រូប បានបរិច្ចាគដោយស្ម័គ្រចិត្ត ចូលរួមក្នុង «ខឿនការពារសុខភាពរបស់ប្រជាជន» ដើម្បីរាជរដ្ឋាភិបាលទិញវ៉ាក់សាំងការពារជំងឺកូវីដ-១៩ សម្រាប់ចាក់ជូនប្រជាពលរដ្ឋដោយឥតគិតថ្លៃ។

ការចូលរួមបរិច្ចាគនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋដោយឥតគិតថ្លៃ ស្របពេលដែលជំងឺកូវីដ១៩ បានឆ្លងចូលដល់សហគមន៍កម្ពុជា។

សូមបញ្ជាក់ថា សម្តេចតេជោ ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ជូនប្រជាពលរដ្ឋប្រមាណ ៥០ម៉ឺននាក់៕