(ភ្នំពេញ)៖ ប្រធានគណបក្សខ្មែរតែមួយលោក កែម រិទ្ធិសិត បានប្រកាសលាលែងពីតំណែងប្រធានគណបក្សខ្មែរតែមួយ ដោយសូមផ្ទេរសិទ្ធិទាំងស្រុងទៅឲ្យលោក គុជ លី ដែលជាអនុប្រធានប្រចាំការគណបក្ស ទៅជាប្រធានស្តីទីគណបក្សខ្មែរតែមួយ នេះបើតាមលិខិតផ្ទេរសិទ្ធិដែលបណ្តាញព័ត៌មាន Fresh News ទើបទទួលបានមុននេះបន្តិចនារសៀលថ្ងៃទី១៩ ខែធ្នូ ឆ្នាំ២០២០។

នៅក្នុងលិខិតផ្ទេរសិទ្ធិលោក កែម រិទ្ធិសិត បានបញ្ជាក់ថា ៖ «ខ្ញុំ កែម រិទ្ធិសិត ប្រធានគណបក្សខ្មែរតែមួយ សូមផ្ទេរសិទ្ធិទាំងស្រុងឲ្យលោក គុជ លី ជាអនុប្រធានប្រចាំការគណបក្ស ទៅជាប្រធានស្តីទីគណបក្សខ្មែរតែមួយ ជំនួសខ្ញុំ ដើម្បីចុះហត្ថលេខាលើលិខិតរដ្ឋបាលនានារបស់គណបក្ស និងការដឹកនាំ ការគ្រប់គ្រង ការចាត់ចែងការងារទូទៅរបស់គណបក្សខ្មែរតែមួយទាំងអស់»។

ដោយឡែកនៅក្នុងសេចក្តីជូនដំណឹង លោក កែម រិទ្ធិសិត បានអះអាងថា «ដើម្បីប្រជាធិបតេយ្យផ្ទៃក្នុងគណបក្ស ខ្ញុំស្ម័គ្រចិត្តមិនឈរឈ្មោះធ្វើជាបេក្ខភាពប្រធានគណបក្សខ្មែរតែមួយ នៅអាណត្តិទី២ទៀតទេ។ ដូច្នេះសេចក្តីសម្រេចនេះចូលជាធរមាន ចាប់ពីថ្ងៃចុះហត្ថលេខារបស់ខ្ញុំនះតទៅ» ។

គណបក្សខ្មែរតែមួយ ត្រូវបានបង្កើតឡើង កាលពីខែមីនា ឆ្នាំ២០១៨ ដោយ លោក កែម រិទ្ធិសិត និងអ្នកនយោបាយមួយក្រុម ដែលក្នុងនោះមាន លោក គុជ លី ផងដែរ ដើម្បីចូលរួមក្នុងការបោះឆ្នោតជ្រើសតាំងតំណាងរាស្រ្ត អាណត្តិទី៦ កន្លងទៅ៕