(ភ្នំពេញ)៖ ​ទណ្ឌិត​ម្នាក់​ជា​អតីត​នាយក​ក្រុមហ៊ុន​រ៉ុក​ស្ទៀល​ស៊ុន​ឡេង​ មាន​សាល​ក្រម​​និង​សាលដីកា​ស្ថាពរ​ចំនួន​៥​ និង​ មាន​ទោស​សរុប​ចំនួន​៥ឆ្នាំ​៦ខែ​  ពី​បទ​ចេញ​សែក​គ្មាន​​សាច់​ប្រាក់​​រាប់​ម៉ឺន​ដុល្លារ​អាមេរិក​ ដែលប្តឹង​ដោយ​លោក​ សុខ​ ហួត​ នាយក​ប្រតិបត្តិ​ក្រុមហ៊ុន​​ប្រេង​ឥន្ធនៈ​​សាវី​ម៊ិច​ អាច​នឹង​ត្រូវ​សាលាឧទ្ធរណ៍​ កាត់​ទោស​តម្រឹម​ដោះលែង​ឲ្យ​មាន​សេរីភាព​ឡើងវិញ​ ។

នៅ​ព្រឹក​ថ្ងៃ​ទី​១៦​ ខែ​កុម្ភៈ​ ឆ្នាំ​២០១៦​ សាលាឧទ្ធរណ៍​បាន​បើក​សវនាការ​ជំនុំជម្រះ​បណ្តឹង​ស្រូប​ទោស​របស់​ទណ្ឌិត​ឈ្មោះ​ យូ​ ស៊ុន​ឡេង​ ជា​អតីត​នាយក​ក្រុមហ៊ុន​រ៉ុក​ស្ទៀល​ស៊ុន​ឡេង​ ដោយ​មាន​លោក​ស្រី​ ទិត​សុទ្ធី​ បូរ៉ា​លក្ខណ៍​ ជា​ប្រធាន​ក្រុម​ប្រឹក្សា​ជំនុំជម្រះ​ និង​ លោក​ តាន់​ សេ​ណារ៉ុង​ ជា​តំណាង​មហា​អយ្យការ​។

នាពេល​សវនាការ​ ជនជាប់ចោទ​បាន​ស្នើ​ឲ្យ​សាលាឧទ្ធរណ៍​ស្រូប​ទោស​តម្រឹម​ត្រឹម​២ឆ្នាំ​៦ខែ​ ដែល​បច្ចុប្បន្ន​ទណ្ឌិត​រូបនេះ​ជាប់​ពន្ធនាគារ​ចំនួន​២ឆ្នាំ​៧ខែ​ជាង​មក​ហើយ​។ ការ​ស្នើ​នេះ​ទណ្ឌិត​បាន​ភ្ជាប់​ជា​មួយ​លិខិត​បញ្ជាក់​កិរិយា​មាយាទ​ដែល​ចេញ​ដោយ​អគ្គនាយកដ្ឋាន​ពន្ធនាគារ​ក្រសួង​មហាផ្ទៃ​ ។  

មិន​យល់​ទាស់​នឹង​សំណើ​នេះ​ លោក​ តាន់​ សេណារ៉ុង​ បាន​ស្នើ​ឲ្យ​តុលាការ​សម្រេច​តាម​ច្បាប់​ ។ ​ក្រោយ​ការ​សួរ​ដេញដោល​ លោក​ស្រី​ចៅក្រម​ បាន​សម្រេច​លើក​ពេល​ប្រកាស​សាលដីកា​ ទៅ​ថ្ងៃ​ទី​២៩​ ខែ​កុម្ភៈ​ ឆ្នាំ​២០១៦​ ខាងមុខ​នេះ​ ។

អ្នក​តាម​ដាន​សវនាការ​ មើល​ឃើញ​ថា​ ទណ្ឌិត​រូបនេះ​ អាច​នឹង​ត្រូវ​ដោះលែង​ឲ្យ​មាន​សេរីភាព​ឡើងវិញ​៕​