(ភ្នំពេញ)៖ ក្រុមគ្រូពេទ្យ នៃក្រុមប្រឹក្សាគណៈគ្រូពេទ្យជាតិកម្ពុជា បានរ៉ៃអង្គាសថវិកាគ្នាបានប្រមាណ ២២,២៩២ដុល្លារ ជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីទិញវ៉ាក់សាំងកូវីដ-១៩ សម្រាប់ចាក់ជូនប្រជាពលរដ្ឋដោយឥតគិតថ្លៃ។

គណៈគ្រូពេទ្យជាតិកម្ពុជា បានសំដែងការអរគុណដ៏ជ្រាលជ្រៅចំពោះមន្រ្តីទាំងអស់នៃក្រុមប្រឹក្សាគណៈគ្រូពេទ្យជាតិ ភូមិភាគ និងរាជធានី/ខេត្ត ដែលបានបរិច្ចាកប្រាក់រៀងៗខ្លួន ដើម្បីរួមចំណែកជាមួយរាជរដ្ឋាភិបាល សម្រាប់ទិញវ៉ាកសាំងប្រឆាំងជំងឺ Covid-19 ចាក់ជូនប្រជាពលរដ្ឋ។

សូមបញ្ជាក់ថា សម្តេចតេជោ ហ៊ុន សែន កាលពីថ្ងៃទី០៧ ខែធ្នូ ឆ្នាំ២០២០ បានប្រកាសពីការទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ជូនប្រជាពលរដ្ឋប្រមាណ ៥០ម៉ឺននាក់។

បន្ទាប់ពីការបង្ហាញផែនការទិញវ៉ាក់សាំងការពារជំងឺកូវីដ១៩នេះដែរ មានចលនាមហាជនគាំទ្រសម្តេចតេជោ ហ៊ុន សែន យ៉ាងផុលផុស។ មហាជនមិនត្រឹមតែគាំទ្រផ្នែកទស្សនៈ និងគំនិតប៉ុណ្ណោះទេ តែក៏បានចូលរួមបរិច្ចាគថវិកាជាមួយសម្តេចតេជោផងដែរ។

ព្រះសង្ឃ ព្រះមហាក្សត្រ ព្រះមហាក្សត្រី ថ្នាក់ដឹកនាំស្ថាប័នកំពូលៗរបស់ជាតិ មន្ត្រីរាជការ កងកម្លាំងប្រដាប់អាវុធ អ្នកឧកញ៉ា ឧកញ៉ា ពាណិជ្ជករ អាជីវករ កម្មករ សិស្សនិស្សិត និងប្រជាពលរដ្ឋខ្មែរគ្រប់ស្រទាប់វណ្ណៈ បានបរិច្ចាគថវិកាជូនទៅសម្តេចតេជោ។

សម្ដេចតេជោ ហ៊ុន សែន ប្រកាសថា នៅថ្ងៃទី១៥ ខែធ្នូ ឆ្នាំ២០២០ ថវិកាទទួលបានពីសប្បុរសជន មានចំនួន៤៨,០៩៣,៩០៥.១៣ដុល្លារ និង ៣,៩០០លានរៀល

សម្តេចតេជោ ហ៊ុន សែន បានចាត់ទុកការចូលរួមបរិច្ចាគថវិកានេះ ជាស្មារតីសាមគ្គីភាព ជាវប្បធម៌នៃការចែករំលែកក្នុងការប្រយុទ្ធប្រឆាំងជាមួយកូវីដ១៩ ដែលបានក្លាយជាខឿនការពារសុខភាពរបស់ប្រជាជនដ៏រឹងមាំ៕