(ភ្នំពេញ)៖ ក្រសួងប្រៃសណីយ៍ និងទូរគមនាគមន៍ បានអនុវត្តនូវវិធានការការពារ ដែលតម្រូវឱ្យមន្ត្រីរាជការ ពាក់ម៉ាស វាស់កម្តៅ និងបាញ់អាល់កុល ជារៀងរាល់ថ្ងៃធ្វើការ ដើម្បីចូលរួមចំណែកបង្ការ និងប្រយុទ្ធប្រឆាំងនឹងការរីករាលដាលនៃជំងឺកូវីដ-១៩ នៅព្រះរាជាណាចក្រកម្ពុជា ស្របតាមការណែនាំរបស់រាជរដ្ឋាភិបាល និងក្រសួងសុខាភិបាល។
នៅក្នុងយុទ្ធនាការនេះលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ចាត់ឱ្យទិញម៉ាសបន្ថែមចំនួន ២០០០០ បន្ទះទៀត សម្រាប់ចែកជូនមន្ត្រីរាជការគ្រប់រូបក្នុងក្រសួង ដែលក្នុងម្នាក់ៗទទួលបានម៉ាសចំនួន ២៥ បន្ទះ។
បន្ថែមលើនេះ លោករដ្ឋមន្ត្រី បានផ្តាំផ្ញើដល់មន្ត្រីរាជការទាំងអស់ត្រូវយកចិត្តទុកដាក់ ថែរក្សាសុខភាពឱ្យបានគ្រប់គ្នា អនុវត្តតាមការណែនាំរបស់ក្រសួងសុខាភិបាល ជាពិសេសសូមការពារខ្លួនដោយពាក់ម៉ាស់ លាងដៃនឹងសាប៊ូ ឬអាកុលឱ្យបានញឹកញាប់ជាប្រចាំ ដើម្បីជៀសផុតពីជំងឺកូវីដ-១៩៕
