(អារ៉ាប៊ីសាអូឌីត)៖ លោក អូស្មាន់ ហាស្សាន់ រដ្ឋមន្ត្រីប្រតិភូអម នាយករដ្ឋមន្ត្រី និងជារដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី១៤ ខែកុម្ភៈ ឆ្នាំ២០១៦ បានចូលជួបសំដែងការគួរសម ពិភាក្សាការងារវាង លោក Abdullah At-Turki អគ្គលេខាធិការអង្គការ​សម្ព័ន្ធឥស្លាម​ពិភព​លោក​ ​(MWL) ដែលបង្កើត​ឡើង​​នៅ​ឆ្នាំ១៩៦២ ជាអង្គការឥស្លាមដ៏ធំមួយដែលមានអង្គការ-សមាគមអន្តរជាតិចំនួន២១ នៅក្រោម​ចំណុះ មានទីតាំងនៅទីក្រុងម៉ាកះ ប្រទេសអារ៉ាប៊ីសាអូឌីត។

បើតាមការឲ្យដឹងពីលោក អូស្មាន់ ហាស្សាន់ ក្នុងជំនួបនោះ លោកអគ្គលេខាធិការ បានស្នើ និងទទួលយក ហើយសន្យាបន្តពង្រឹងទំនាក់ទំនង រវាងអង្គការ​សម្ព័ន្ធឥស្លាម​ពិភព​លោក​ ជាមួយក្រកម្ពុជា កសាង វិហារ សាលារៀន ចូលរួមកម្មវិធីស្រាយបួយ ឧបត្ថម្ភការបំពេញកាតព្វកិច្ចបុណ្យហាជ្ជី អប់រំ​ សិក្ខា​សាលា ផ្តល់អាហារូបករណ៍ ដល់សិស្សនិស្សិត បោះពុម្ពគម្ពីរអាល់គួរអានជាដើម។

លើសពីនេះ លោកអគ្គលេខាធិការ បានកោតសរសើរចំពោះ សម្តេច​តេជោ ហ៊ុន សែន នាយករដ្ឋមន្រ្តី នៃកម្ពុជា ដោយក្តីគោរពស្រលាញ់ ពេញ​ចិត្ត​ចំពោះការដឹកនាំប្រទេស ដែលធ្វើឲ្យមានសុខសន្តិភាព ស្ថេរ​ភា​ព និងការអភិវឌ្ឍយ៉ាងឆាប់រហ័ស ដែលធ្វើឲ្យគ្រប់សាសនា​នៅ​កម្ពុជា​គ្មានទំនាស់ និងរើសអើង​នឹង​គ្នា៕