(ភ្នំពេញ)៖ សមាគមកីឡាបាល់ទាត់កងយោធពលខេមរភូមិន្ទ (Tiffy Army FC) តាមរយៈលោក ខូវ ឆាយ ជាអគ្គលេខាធិការ បានបរិច្ចាគថវិកា២ពាន់ដុល្លារ ជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីទិញវ៉ាក់សាំងកូវីដ-១៩ សម្រាប់ចាក់ជូនប្រជាពលរដ្ឋដោយឥតគិតថ្លៃ។

ការចូលរួមបរិច្ចាគនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋដោយឥតគិតថ្លៃ ស្របពេលដែលជំងឺកូវីដ១៩ បានឆ្លងចូលដល់សហគមន៍កម្ពុជា។

សមាគមកីឡាបាល់ទាត់ កងយោធពលខេមរភូមិន្ទ (Tiffy Army FC) សូមអំពាវនាវដល់ប្រជាពលរដ្ឋទាំងអស់ ចូលរួមសហការគ្នា ក្នុងការបរិច្ចាគថវិកាផ្ទាល់ខ្លួនតាមលទ្ធភាព ដើម្បីប្រយុទ្ធប្រឆាំងជាមួយកូវីដ១៩។

ជាមួយគ្នានេះ សមាគមកីឡាបាល់ទាត់ កងយោធពលខេមរភូមិន្ទ (Tiffy Army FC) ក៏សូមឲ្យប្រជាពលរដ្ឋទាំងអស់ ចូលរួមអនុវត្តន៌វិធានការអនាម័យ និងសុខភាព តាមការណែនាំរបស់ក្រសួងសុខាភិបាល ដើម្បីប្រទេសយើងជៀសឆ្ងាយពីជំងឺ COVID-19។

សូមបញ្ជាក់ថា សម្តេចតេជោ ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ជូនប្រជាពលរដ្ឋប្រមាណ ៥០ម៉ឺននាក់៕