(ភ្នំពេញ)៖ ក្រុមហ៊ុន 7NG បានបរិច្ចាគថវិកា ៧៧,៧៧៧ដុល្លារ ជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីទិញវ៉ាក់សាំងកូវីដ-១៩ សម្រាប់ចាក់ជូនប្រជាពលរដ្ឋដោយឥតគិតថ្លៃ។

ការចូលរួមបរិច្ចាគនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋដោយឥតគិតថ្លៃ ស្របពេលដែលជំងឺកូវីដ១៩ បានឆ្លងចូលដល់សហគមន៍កម្ពុជា។

សូមបញ្ជាក់ថា សម្តេចតេជោ ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ជូនប្រជាពលរដ្ឋប្រមាណ ៥០ម៉ឺននាក់។

គួរជម្រាបថា នេះមិនមែនជាលើកទី១នោះទេ ដែលក្រុមហ៊ុន 7NG បានចូលរួមចំណែកជាមួយរាជរដ្ឋាភិបាល ពោលកន្លងទៅគឺក្រុមហ៊ុន 7NG តែងចូលរួមជាសកម្មជាមួយសកម្មភាពមនុស្សធម៌ផ្សេង ឬនៅពេលរាជរដ្ឋាភិបាលត្រូវការជំនួយណាមួយពីសប្បុរសជន៕