(ភ្នំពេញ)៖ ករណីភាគីចាញ់ក្ដី មិនព្រមអនុវត្តតាមសាលដីកា តុលាការកំពូលប្រគល់ផ្ទះទៅឲ្យភាគីឈ្នះក្ដី រហូតឈានដល់ការយកប្រេងសាំង ចាក់លើសម្រកកង់ឡាន បង្កជាអគ្គិភ័យ កាលពីព្រឹកថ្ងៃទី១២ ខែកុម្ភៈ ឆ្នាំ២០១៦ រហូតមកទល់ថ្ងៃទី១៣ ខែកុម្ភៈ ឆ្នាំ២០១៦នេះ លោក សេង លាង ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនបងប្អូនបង្កើតពីរនាក់ ដាក់ពន្ធនាគារបណ្តោះអាសន្ន ក្រោមការចោទប្រកាន់ចំនួនពីរបទល្មើស។
ប្រភពព័ត៌មានបានឲ្យដឹងថា បងប្អូនស្រីពីរនាក់នេះឈ្មោះ ស៊ឹង សូណេ និងឈ្មោះ សឹង សំណាង ត្រូវបានតុលាការចោទប្រកាន់ ពីបទប្រឆាំងអ្នករាជការសាធារណៈ និងពីបទធ្វើឲ្យខូចខាតដោយចេតនា មានស្ថានទម្ងន់ទោស ដោយសារការប្រើប្រាស់វិធីគ្រោះថ្នាក់ដល់បុគ្គល តាមមាត្រា៤១៣ និងមាត្រា៥០៣នៃក្រមព្រហ្មទណ្ឌ ។ បទល្មើសទាំងពីរនេះ កំណត់ការផ្តន្ទាទោសពី ២ឆ្នាំ១ខែ ទៅ៥ឆ្នាំ៣ខែ និងពិន័យពី៤លាន១សែនរៀល ទៅ១០លាន៣សែនរៀល។
គួររំលឹកថា កាលពីព្រឹកថ្ងៃទី១២ ខែកុម្ភៈ ឆ្នាំ២០១៦ គណៈកម្មការចម្រុះសាលាខណ្ឌដូនពេញ ដឹកនាំលោក សុខ ពេញវុធ អភិបាលរងខណ្ឌដូនពេញ ក្រោមការសម្របសម្រួលតាមផ្លូវច្បាប់ ពីលោកស្រី ស៊ី វណ្ណី ព្រះរាជអាជ្ញារង អមសាលាដំបូងរាជធានីភ្នំពេញ បានចុះអនុវត្តសាលដីកាស្ថាពរ រដ្ឋប្បវេណី របស់តុលាការកំពូល លេខ៤៤ ចុះថ្ងៃទី០១ ខែកុម្ភៈ ឆ្នាំ២០០៧ ប្រគល់ដីឡូតិ៍ និងផ្ទះលេខ៩៧B ផ្លូវ១០៨ ក្រុមទី១៦ សង្កាត់វត្តភ្នំ ខណ្ឌដូនពេញ ទៅឲ្យភាគីឈ្នះក្ដីឈ្មោះ ស៊ឹម ឡង គ្រប់គ្រងជាម្ចាស់កម្មសិទ្ធិ ដោយមានអ្នកស្រី ទី គឹមស្រ៊ាន ជាមេធាវី ដោយអាណត្តិ ធ្វើជាតំណាង។ ប៉ុន្ដែភាគីចាញ់ក្ដីមិនព្រមអនុវត្តតាមការអនុវត្តនេះទេ ពោលគឺបានយកប្រេងសាំង ចាក់លើសម្រកកង់ឡានបង្កជាអគ្គិភ័យ បង្កការភ្ញាក់ផ្អើលដល់ប្រជាពលរដ្ឋ។
ក្រោយហេតុការណ៍នេះ រថយន្តពន្លត់អគ្គិភ័យ បានចុះអន្តរាគមន៍បាញ់ពន្លត់ ដែលក្នុងនោះមានស្ត្រីម្នាក់ជាភាគីចាញ់ក្ដី រងរបួសធ្ងន់ផងដែរ៕
