(បន្ទាយមានជ័យ)៖ នៅយប់ថ្ងៃទី១០ ខែកុម្ភៈ ឆ្នាំ២០១៦ កំលាំងសមត្ថកិច្ចបានឃាត់ខ្លួន ជនសង្ស័យប្រុសស្រីបានចំនួន៣នាក់ និងដកហូតវត្ថុតាងសំរាប់ជក់ថ្នាំញៀនរួមមានថង់កែច្នៃសំរាប់ដាក់ថ្នាំញៀន១ថង់ ដែកកេសសំរាប់ជក់ថ្នាំ៨ ទែរម៉ូម៉ែត្រ១ គំរបដបកែច្នៃសំរាប់ជក់ចំនួន២ និងកាំបិតដងឈើ១ ។
នគរបាលក្រុងសិរីសោភ័ណ បានសហការណ៍ជាមួយកំលាំងនគរបាលប្រឆាំង នឹងការជួញដូរគ្រឿងញៀនបានចុះបង្ក្រាបករណីជក់គ្រឿងញឿនខុសច្បាប់មួយកន្លែងនៅចំណុច ផ្លូវចូលខាងកើតរង្វង់មូលស្រីគ្រប់ល័ក្ខក្នុងចំណុចភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
លោក ចាប សុផាឬទ្ធិ ស្នងការរងនគរបាលខេត្ត គ្រប់គ្រងផ្នែកគ្រឿងញៀនបានឲ្យដឹងនៅថ្ងៃទី១១ ខែកុម្ភៈ ថា ជនសង្ស័យទាំង៣នាក់នោះមាន១ឈ្មោះ ស៊ឹម សារ ភេទស្រី អាយុ២៤ឆ្នាំ ទី២មានឈ្មោះ សុក គឹមស៊ួ ភេទប្រុស អាយុ៣២ឆ្នាំ និងទី៣ មានឈ្មោះ គង់ សុធា ភេទប្រុស អាយុ២៤ឆ្នាំ អ្នកទាំង៣នាក់រស់នៅក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
ជនសង្ស័យទាំង៣នាក់នៅមុខសមត្ថកិច្ចបានឆ្លើយសារភាពថា ខ្លួនទាំង៣នាក់ពិតជាបាននាំគ្នាលួចជក់គ្រឿងញៀននៅចំណុចកើតហេតុពិតប្រាកដមែន។ ក្រោយពីបានចំលើយសារភាពហើយជនសង្ស័យទាំង៣នាក់ ត្រូវនគរបាលបញ្ជូនទៅតុលាការដើម្បីដាក់ទោសទៅតាមផ្លូវច្បាប់៕
