(តួកគី)៖ កងកម្លាំងយោធារបស់ប្រទេសតួកគី ដែលឈរជើងនៅតាមព្រំដែន បានឃាត់ខ្លួន​ជនជាតិ​ស៊ីរី​ជាង ៣០នាក់ បន្ទាប់ពីពួកគេបានឆ្លងដែនចូលទឹកដីតួកគី ដោយភ្ជាប់មកជាមួយនូវគ្រឿងផ្ទុះ យ៉ាង​ច្រើនសន្ធឹក នេះបើយោងតាមការចេញផ្សាយរបស់​សារព័ត៌មាន Daily Mail ចេញផ្សាយនៅ​ថ្ងៃ​ព្រហស្បតិ៍ ទី១១ ខែកុម្ភៈ។

តាមការបញ្ជាក់ពីមន្ត្រីយោធាតួកគីបានឲ្យដឹងថា ជនជាតិស៊ីរី ចំនួន ៣៤នាក់ត្រូវបានឃាត់ខ្លួន ក្នុង​នោះមានបុរសបួននាក់, ស្ត្រី ១០នាក់ និងក្មេង២០នាក់ ដោយការឃាត់ខ្លួននោះត្រូវបានធ្វើឡើងនៅ​ក្បែរទីក្រុង Oguzeli បន្ទាប់ពីពួកគេបានឆ្លងដែនចូល​មក​កាន់ទឹកដីតួកគី ក្នុងមានជាជនភៀសខ្លួន។ នៅក្នុងខ្លួនរបស់ពួកគេ ត្រូវបានយោធាតួកគីរកឃើញ មាន​គ្រឿងផ្ទុះ និងអាវកាក់ ដែលពាក់សម្រាប់ធ្វើអត្តឃាត​បំផ្ទុះគ្រាប់បែក។

អាជ្ញាធរតួកគី នៅមិនទាន់កំណត់បានថា ពួកគេទាំងនេះ ជាប់ពាក់ព័ន្ធនឹងក្រុមឧទ្ទាម ISIS ឬមួយ​យ៉ាងណានោះទេ ប៉ុន្តែសារព័ត៌មានក្នុងស្រុកបានចេញផ្សាយថា ពួកគេគឺជាប់ពាក់ព័ន្ធនឹងក្រុម ISIS។

គួរបញ្ជាក់ផងដែរថា តួកគីបានផ្ដល់ជម្រកដល់ជនភៀសខ្លួនស៊ីរីប្រមាណជា ៣លាននាក់ និង​បច្ចុប្បន្ន​កំពុងតែបន្តផ្ដល់បន្ថែមទៀត ប៉ុន្តែត្រូវការជំនួយពីអន្តរជាតិ៕