(ភ្នំពេញ)៖ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ របស់គឺលោក អាត់ ធន់ និងសហការី៣នាក់ទៀត ត្រូវបានលោកស្រី ម៉ាលីន ព្រះរាជអាជ្ញារងសាលាដំបូងរាជធានីភ្នំពេញ នៅរសៀលថ្ងៃទី៨ ខែកុម្ភៈ ឆ្នាំ២០១៦ម្សិលមិញ បានសម្រេចចោទប្រកាន់ពីបទ រារាំងអាជ្ញាធរសាធារណៈ និងបទញុះញង់ឲ្យមានអំពើហិង្សា ដោយភ្ជាប់ព្រឹត្តិការណ៍ហិង្សា នៅមុខក្រុមហ៊ុនកាពីតូល ដែលបណ្ដាលឲ្យ អធិការរងនគរបាលខណ្ឌ៧មករាម្នាក់ និងនគរបាលប៉ុស្តិ៍វាលវង់ម្នាក់រងរបួស។
សូមបញ្ជាក់ថា នៅរសៀលថ្ងៃទី០៨ ខែកុម្ភៈដដែលនោះ បុរសម្នាក់ជាអតីតអ្នកបើកបររថយន្តក្រុងកាពីតូល និងបុរសម្នាក់ជាអ្នករត់ម៉ូតូឌុប ត្រូវបានចៅក្រមស៊ើបសួរ សម្រេចឃុំខ្លួនដាក់ពន្ធនាគារ ក្រោមការចោទប្រកាន់ពីបទ ហិង្សាដោយចេតនាមានស្ថានទម្ងន់ទោស និងបទប្រឆាំងអ្នករាជការសាធារណៈ ដើម្បីរង់ចាំការស៊ើបអង្កេតបន្តទៀត ។
សមត្ថកិច្ចនគរបាលខណ្ឌ៧មករា ឲ្យដឹងថា៖ មនុស្សទាំងពីរនាក់នេះឈ្មោះ ណន វណ្ណា អាយុ៣៨ឆ្នាំ មុខរបរជាអតីតអ្នកបើកបររថយន្តក្រុងកាពីតូល មានទីលំនៅផ្ទុះជួល ផ្លូវលំ សង្កាត់ភ្នំពេញថ្មី ខណ្ឌសែនសុខ និង ឈ្មោះ រស់ ស៊ីផៃ អាយុ៣៣ឆ្នាំ មានមុខរបរជាអ្នករត់ម៉ូតូឌុប មានទីលំនៅផ្ទុះលេខ៥៨០ ផ្លូវឡកំបោ សង្កាត់ស្វាយប៉ាក ខណ្ឌព្រែកព្នៅ ត្រូវបានសមត្ថកិច្ចឃាត់ខ្លួន កាលពីថ្ងៃទី៦ ខែកុម្ភៈ ឆ្នាំ២០១៦ យោងតាមពាក្យបណ្ដឹងរបស់ឈ្មោះ ឆែល វណ្ណណេង អាយុ២៣ឆ្នាំ ជានគរបាលប៉ុស្តិ៍វាលវង់ និង ឈ្មោះ អ៊ូ ពៅ អាយុ៤២ឆ្នាំ ជាអធិការរងនគរបាលខណ្ឌ៧មករា៕
Posted by Fresh News Photo on Saturday, February 6, 2016
