(បន្ទាយមានជ័យ)៖ លោក ស សេរីវិចិត្រ ប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជា តំបន់ឆ្នេរខាងលិចនៃសហរដ្ឋអាមេរិក និងសហការីបានចូលរួមកម្មវិធីសប្បុរសធម៌ជាមួយលោក ម៉ឹង ពន្លក ប្រធានសមាគមចលនាយុវជនកម្ពុជា (ក្រុម១៥៧) នាំយកអំណោយទៅចែក ជូនពលរដ្ឋរងគ្រោះដោយសារទឹកជំនន់ ក្នុងខេត្តបន្ទាយមានជ័យ។
ការនាំយកអំណោយទៅចែកជូន ពលរដ្ឋរងគ្រោះដោយសារទឹកជំនន់ ក្នុងខេត្តបន្ទាយមានជ័យនេះ ធ្វើឡើងក្រោមការចូលរួមពីលោក គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ និងលោអភិបាលខេត្តបន្ទាយមានជ័យ ព្រមទាំងមន្រ្តីថ្នាក់ដឹកនាំខេត្តមួយចំនួនផងដែរ។
ក្នុងនោះលោក ម៉ឹង ពន្លក ក៏បានដឹកនាំសមាជិក សមាជិកា ស្នាក់ការកណ្តាល សាខាខេត្តកណ្តាល សាខាខេត្តក្រចេះ សាខាខេត្តព្រះសីហនុ សាខាខេត្តសៀមរាប សាខាខេត្តប៉ៃលិន សាខាខេត្តតាកែវ សាខាខេត្តបាត់ដំបង សាខាកោះកុង និងសាខាខេត្តបន្ទាយមានជ័យ សហការជាមួយមូលនិធិ ខ្មែរមានខ្មែរ សប្បុរសជនខ្មែរ-អាមេរិកកាំង ក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជា នៅសហរដ្ឋអាមេរិក កាកបាទក្រហមកម្ពុជា ស.ស.យ.ក ចូលរួមផងដែរ។
ការនាំយកអំណោយមកចែក ជូនប្រជាពលរដ្ឋដែលទទួលរងគ្រោះដោយសារគ្រោះទឹកជំនន់ មានចំនួន៣,៣០០គ្រួសារ ស្ថិតនៅក្នុងបរិវេណវិទ្យាល័យ ហ៊ុន សែន ទឹកជោរ ក្នុងភូមិទឹកជោរ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ។
អំណោយរបស់សប្បុរសជន ផ្ដល់ជូនដោយក្នុងមួយគ្រួសារទទួលបាន៖ អង្ករ២៥គីឡូក្រាម, មី១កេស, ត្រីខ១យួរ, ទឹកស៊ីអៀវ ១ដប, សាប៊ូ២ដុំ, ក្រម៉ា១, សៀង ១ដប, ថ្នាំពេទ្យ១ប្រអប់, ឆៃប៉ូវ ៥គីឡូក្រាម, ថវិកា ៥០,០០០រៀល។
ក្នុងនោះជនពិការចំនួន៥រូប ក៏បានទទួលអំណោយជារទេះ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផងដែរ។
បន្ទាប់ពីនោះក្រុមការងារ ក៏បានបន្តនាំយកអំណោយ ដូចបានរៀបរាប់ខាងលើចំនួន២៣សំរាប់ ចែកជូនដល់ខ្នងផ្ទះប្រជាពលរដ្ឋ ដែលកំពុងមានទឹកលិចទៀតផង៕
