(ភ្នំពេញ)៖ គណបក្សរាជានិយមហ៊្វុនស៊ិនប៉ិច របស់សម្តេចក្រុមព្រះ នរោត្តម រណឫទ្ធិ នៅថ្ងៃទី០៦ ខែកុម្ភៈ ឆ្នាំ២០១៦នេះ បានចេញលិខិតបញ្ចប់សមាជិកភាពបក្សចំនួន ២៣រូប ដែលក្នុងនោះរួមមានលោក ញឹក ប៊ុនឆៃ អតីតអនុប្រធានទី២ គណបក្សផងដែរ។
ការចេញលិខិតបញ្ចប់សមាជិកភាព របស់សមាជិកបក្សទាំង២៣រូបនេះ បានធ្វើឡើងបន្ទាប់ពី លោក ញឹក ប៊ុនឆៃ និងអ្នកគាំទ្ររបស់លោក កាលពីថ្ងៃទី០៣ ខែកុម្ភៈ កន្លងទៅនេះ បានប្រកាសដើរចេញពីគណបក្សហ៊្វុនស៊ិនប៉ិច ទៅបង្កើតគណបក្សថ្មីឈ្មោះថា «គណបក្សរួបរួមជាតិ»។
សូមបញ្ជាក់ថា កាលពីឆ្នាំ២០០៦ លោក ញឹក ប៊ុនឆៃ និងបក្ខពួករបស់លោកធ្លាប់បាន ធ្វើរដ្ឋប្រហារបណ្តេញសម្តេចក្រុមព្រះចេញពីបក្ស តែពេលនេះលោកបានដើរចេញពីបក្សវិញម្តង បន្ទាប់ពីរូបលោកមិនពេញចិត្តចំពោះការដឹកនាំរបស់សម្តេចក្រុមព្រះ ក្នុងរយៈពេលជាង១ឆ្នាំកន្លងមកនេះ៕
