(ភ្នំពេញ)៖ ដើម្បីធានាសុខភាពប្រជាពលរដ្ឋ និងសុវត្ថិភាពម្ហូបអាហារ ក៏ដូចជាតាមការណែនាំពីលោក ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) នៅព្រឹកថ្ងៃទី២៨ ខែតុលា ឆ្នាំ២០២០នេះ លោក ហេង មាលី ប្រធាន ក ប ប សាខារាជធានីភ្នំពេញ បានសហការជាមួយមន្រ្តីមន្ទីរពាណិជ្ជកម្ម និងគណៈកម្មការផ្សារ បាននាំរថយន្តពិសោធន៍ចល័ត របស់អគ្គនាយកដ្ឋាន ចំនួន២គ្រឿង បន្តចុះផ្សព្វផ្សាយអំពីគុណភាព សុវត្ថិភាពម្ហូបអាហារ ត្រួតពិនិត្យទៅលើទំនិញម្ហូបអាហារ វេចខ្ចប់ស្រាប់ នៅផ្សារដើមគរ និងផ្សារទួលទំពូង ក្នុងរាជធានីភ្នំពេញ។
លោក ហេង មាលី ប្រធានការពារអ្នកប្រើប្រាស់កិច្ចការប្រកួតប្រជែង និងបង្រ្កាបការក្លែងបន្លំ សាខារាជធានីភ្នំពេញ បានឲ្យដឹងថា នៅក្នុងសកម្មភាព ចុះត្រួតពិនិត្យ មន្ត្រីជំនាញ បានយកគំរូម្ហូបអាហារ ចំនួន៥២គំរូ មកធ្វើតេស្តបឋម ដើម្បីរកសារធាតុគីមីហាមឃាត់ ដែលអាចធ្វើឲ្យប៉ះពាល់ដល់សុខភាពប្រជាពលរដ្ឋ ជាលទ្ធផលនៅក្នុងប្រតិបត្តិការ ចុះអង្កេតនៅផ្សារដើមគរ និងផ្សារទួលទំពូង ខាងលើ មន្ត្រីជំនាញពុំបានរកឃើញ ផលិតផលណាមួយ ខូចគុណភាព រឺហួសកាលបរិច្ឆេទ នោះឡើយ ។
លោក ហេង មាលី ក៏បានណែនាំ អប់រំបន្ថែម ដល់អាជីវករទាំងអស់ សូមធ្វើការត្រួតពិនិត្យ ទំនិញរបស់ខ្លួនឲ្យបានជាប់ជាប្រចាំ និងចូលរួមសហការ អនុវត្តឲ្យបានត្រឹមត្រូវ ទៅតាមស្តង់ដារបច្ចេកទេស ក៏ដូចជាលក្ខខ័ណ្ឌតម្រូវ នៃបទបញ្ញត្តបច្ចេកទេស ជាពិសេសភាពអនុលោមទៅនឹងច្បាប់ស្តីពី «ការគ្រប់គ្រង គុណភាព សុវត្ថិភាព លើផលិតផលទំនិញ និងសេវា» និង ច្បាប់ស្តីពី «កិច្ចការពារអ្នកប្រើប្រាស់»៕
