(ភ្នំពេញ)៖ បុរស២នាក់នៅក្បែរខាងគ្នា ដែលគេអះអាងថា មិនសូវជាមានភាពល្អ ជានិងគ្នាបានផឹកស្រាជាមួយគ្នាលុះដល់ស្រវឹងរៀងៗខ្លួន ក្លែមសម្តីឌឺដងផ្លែផ្កាដាក់គ្នា ទៅវិញទៅមក កើតជាជម្លោះឈានដល់ការវាយតប់គ្នា ទាញកាំបិទចុងស្រួចចាក់ដៃគូ ជម្លោះបណ្តាលឲ្យរងរបួសធ្លាយពោះ ជនបង្កត្រូវសមត្ថកិច្ចឃាត់ខ្លួន រីឯជនរងគ្រោះត្រូវដេកពេទ្យ។

លោក ថាច់ សុវណ្ណា ប្រធានព្រហ្មទណ្ឌ នៃអធិដ្ឋានស្រុកអង្គស្នួល បានប្រាប់ភ្នាក់ងារព័ត៌មាន Fresh News ឲ្យដឹងនៅព្រឹកថ្ងៃទី២៨ តុលា ឆ្នាំ២០២០នេះថា ហេតុការណ៍ខាងលើនេះ បានកើតឡើងកាលពីយប់ថ្ងៃទី២៧ ខែតុលា ឆ្នាំ២០២០ វេលាម៉ោង ១០៖៣០នាទី ចំណុចភូមិបាសិទ្ធិ ឃុំម្កាក់ ស្រុកអង្គស្នួល ខេត្តកណ្តាល។

លោក ថាច់ សុវណ្ណា បានឲ្យដឹងថា ជនរងគ្រោះឈ្មោះ ហ៊ន នឿន ភេទប្រុស អាយុ៤០ឆ្នាំ ជនជាតិខ្មែរ មុខរបរកសិករ នៅភូមិបាសិទ្ធិ ឃុំម្កាក់ ស្រុកអង្គស្នួល ខេត្តកណ្តាល។ ចំណែកជនសង្ស័យឈ្មោះ ហ៊ល ណាប់ ភេទប្រុស អាយុ៤១ឆ្នាំ ជនជាតិខ្មែរ មុខរបរកសិករ នៅភូមិបាសិទ្ធិ ឃុំម្កាក់ ស្រុកអង្គស្នួល ខេត្តកណ្តាល មានរបួសភ្នែកខាងស្ដាំ និង រលាត់ស្បែកក្បាល់ជង្គង់ខាងស្ដាំ (ឃាត់ខ្លួន)។

លោក ថាច់ សុវណ្ណា បានឲ្យដឹងទៀតថា ដំណើររឿងនៅមុនពេលកើតហេតុ ជនរងគ្រោះ និងជនសង្ស័យ បានផឹកស្រាជាមួយគ្នាលុះស្រវឹងដូចគ្នា ហើយបានឈ្លោះទាក់ពាក្យសម្ដីគ្នាទៅវិញទៅមក លុះដល់ម៉ោងកើតហេតុជនរងគ្រោះ បានដេកលើអង្រឹងក្នុងតូបលក់ផ្លែឈើខាងមុខផ្ទះ។

ពេលនោះជនសង្ស័យ បានយកកាំបិតមុខស្រួចទៅចាក់ជនរងគ្រោះចំក្បាលពោះមួយកាំបិត ហើយជនរងគ្រោះក្រោកឡើង ក៏បានវាយប្រតាយប្រតប់គ្នាទៅវិញទៅមក បន្ទាប់មកជនរងគ្រោះបានគេចខ្លួនចេញទៅមណ្ឌលសុខភាពឃុំ ដើម្បីព្យាបាលរបួសតែម្តង។ កន្លងមក ជនសង្ស័យ និង ជនរងគ្រោះ ធ្លាប់មានជម្លោះគ្នាជាច្រើន លើកមកហើយ តែមិនដែលប្ដឹងផ្ដល់គ្នាឡើយ។

បច្ចុប្បន្ន ជំនាញផ្នែកនគរបាលយុត្តិធម៌ នៃអធិការរដ្ឋានស្រុកអង្គស្នួល បានកំពុងសួរនាំនិងកសាងសំណុំរឿង ចាត់ការតាមផ្លូវច្បាប់៕