(កំពង់ចាម)៖ អភិបាលខេត្តកំពង់ចាម លោក លន់ លឹមថៃ នឹងសងប្រាក់ ចំនួន ៨០ដុល្លារ ជំនួសនារីម្នាក់ ដែលប្តីរបស់ខ្លួនជំពាក់ប្រាក់ក្រុមហ៊ុន KBA រហូតមាន ការប្តឹងផ្តល់ ហើយចាប់ដាក់ពន្ធនាគារនោះ។

មន្រ្តីសាលាខេត្តកំពង់ចាម បានប្រាប់អង្គភាព Fresh News នៅព្រឹកថ្ងៃទី៦ ខែកុម្ភៈ ឆ្នាំ២០១៦នេះថា «រឿងនេះឯកឧត្តម លន់ លឹមថៃ លោកនឹងដោះស្រាយបញ្ហាជូននេះ ជូនក្មួយស្រី សូមក្មួយស្រីកុំបារម្មណ៍ ហើយក្មួយស្រីទាក់ទៅលោកផ្ទាល់ លោកនឹងចេញ ប្រាក់សង ធ្វើយ៉ាងណាឲ្យក្មួយប្រុសនោះ មានសេរីភាពឡើងវិញ»។

មន្រ្តីរូបនេះ បានបញ្ជាក់ថា ក្រោយអង្គភាព Fresh News ចុះផ្សាយរឿងនេះភ្លាម លោកអភិបាលខេត្តក៏បញ្ជាក់ត្រឡប់មកវិញនឹងចេញសង ហើយជួយដោះស្រាយតាមនីតិវិធីច្បាប់ ដើម្បីឲ្យប្តីរបស់ខ្លួនមានសេរីភាពឡើងវិញ។

សូមបញ្ជាក់ថា នារីម្នាក់ឈ្មោះ ឡន ចិន្តា ហៅអាគីម បានទទូចអង្វរសុំ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ឲ្យជួយស្វាមីរបស់ខ្លួនដែលត្រូវបានថៅ កែក្រុមហ៊ុន KBA លោក ក្រុយ វុត្ថា ប្តឹងសមត្ថកិច្ចចាប់ដាក់ពន្ធនាគារ ព្រោះរឿងលុយប្រមាណ ៨០ដុល្លារ។

ភ្ជាប់ជាមួយវីដេអូឃ្លីបរៀបរាប់ពីដំណើររឿង និងសុំការជួយសង្រ្គោះពី នាយករដ្ឋមន្រ្តី ដែលបានផ្ញើមកកាន់ទំព័រ Facebook របស់  Fresh News នៅថ្ងៃទី០៥ ខែកុម្ភៈ ឆ្នាំ២០១៦នេះ អ្នកនាង ឡន ចិន្តា បានឲ្យដឹងថា ស្វាមីរបស់នាង ត្រូវបានកងរាជអាវុធហត្ថខេត្តកំពង់ចាម ចាប់ដាក់ពន្ធនាគារអស់រយៈពេល ១០ថ្ងៃ មកហើយ តាមពាក្យបណ្តឹងរបស់លោក ក្រុយ វុត្ថា ប្រធានក្រុមហ៊ុនKBA ពីបទ លួចទំនិញ។

ឡន ចិន្តា បានបញ្ជាក់ថា ការចាប់ខ្លួននេះ បានកើតមានឡើងបន្ទាប់ពី ស្វាមីរបស់ខ្លួនឈប់បម្រើការងារនៅនៅក្នុងក្រុមហ៊ុន KBA និង  បានជាប់ទៅ ជាមួយបន្ទះការពារវិទ្យុសកម្មជាង១០បន្ទះ ដែលមានតម្លៃសរុបប្រមាណ ៨០ដុល្លារ ហើយក៏បានសន្យាយកជូនក្រុមហ៊ុនវិញផងដែរ។ លុះដល់ថ្ងៃទី២៥ ខែមករា ឆ្នាំ២០១៦ កន្លងទៅ ប្តីរបស់នាងមិនទាន់ទាំងបានយកបន្ទះនេះសងវិញផងក៏ត្រូវលោក ក្រុយ វុត្ថា ប្តឹងសមត្ថកិច្ចចាប់ខ្លួន ហើយទាមទារឲ្យសងជំងឺចិត្តរហូតដល់ទៅ៨លានរៀល។ អ្នកនាង ឡន ចិន្តា បានបន្តទៀតថា ក្រោយពេលចាប់ខ្លួនភ្លាមៗនោះ នាងបានព្យាយាម សុំអង្វរថៅកែ និងរកលុយសងវិញផងដែរ តែមិនទទួលបានការអាណិតអាសូរ ពីថ្ងៃកែនោះឡើយ។

នារីជាភរិយា បានរៀបរាប់យ៉ាងដូច្នេះ «ក្នុងនាមយើងខ្ញុំជាបុគ្គលិក ស៊ីប្រាក់ខែត្រឹមតែមួយរស់ ហើយត្រូវចិញ្ចឹមម្តាយ មានជីវភាពក្រីក្រ រស់នៅមាន ការខ្វះខាត ខិតខំធ្វើការបម្រើក្រុមហ៊ុនរកលុយឱក្រុមហ៊ុន មិនគិតពីការលំបាក ចុះខេត្តទាំងឈឺទាំងជា ដើម្បីត្រឹមតែរស់ មិនគួរណាត្រឹមកំហុសតិចតួចប៉ុណ្ណេះ លោកថៅកែមានចិត្តឃោរឃៅប្តឹងចាប់ប្តីនាងខ្ញុំដាក់គុក ហើយឱគ្រួសារនាងខ្ញុំរកលុយ ៨លានរៀលមកលោះ។ តើឲ្យគ្រួសារនាងខ្ញុំរកលុយ ៨លានរៀល ពីណាមកជូនលោកថៅកែ? បើគ្រួសារនាងខ្ញុំក្រីក្រយ៉ាងនេះ? បើរឿងនេះ កើតឡើងចំពោះបងប្អូន កូនចៅលោកថៅកែវិញ តើលោកថៅកែឈឺចាប់ទេ? នាងខ្ញុំ និងគ្រួសារទ័លច្រកហើយ គឺមានតែម្រាមដៃដប់ សំពះសុំឲ្យបងប្អូនមហាជន និងសម្តេចតេជោ ហ៊ុន សែន ដែលតែងតែគិតដល់សុខទុក្ខប្រជាជន មានការលំបាក ជួយដល់ក្រុម គ្រួសារនាងខ្ញុំផង ឥឡូវនេះឪពុក-ម្តាយប្តីខ្ញុំ គាត់ដឹងដំណឹងនេះហើយ គាត់ភ័យតក់ស្លុតណាស់រហូតធ្លាក់ខ្លួនឈឺទៀត»។

លោក ក្រុយ វុត្ថា ថៅកែក្រុមហ៊ុន KBS លក់បន្ទះការពារវិទ្យុកម្ម បានប្រាប់ Fresh News ថា ការដែលលោកប្តឹង ឲ្យសមត្ថកិច្ចចាប់ ខ្លួននេះ ដោយសារបុគ្គលិករបស់លោក ឈ្មោះ គង់ ចំរើន នេះ បានឈប់ពីការងារ ដោយមិនបានជូនដំណឹងទៅរូបលោក ហើយថែម  ទាំងពាក់ ឯកសណ្ឋាន និងទំនិញរបស់ក្រុមហ៊ុនទៅជាមួយថែមទៀត។ រូបលោក បានទុកពេលជាច្រើនខែឲ្យបុគ្គលិករូបនេះ ចូលខ្លួនទៅដោះស្រាយបញ្ហា តែរូបគេមិនព្រមចូលទៅ ទើបលោកសម្រេចឲ្យអាវុធហត្ថចាប់ខ្លួនតែម្តង។

លោក ក្រុយ វុត្ថា បានអះអាងថា លោកមិនព្រមលើកលែងឲ្យបុគ្គលិករូបនេះឡើយ គឺនឹងឲ្យ តុលាការបន្តនីតិវិធី ហើយរង់ចាំតទល់ក្តីនៅតុលាការជានិច្ច។ លោក បានហៅការ ចាត់ការនេះថា ធ្វើដើម្បីព្រមានដល់បុគ្គលិកដទៃទៀតដែលខិលខូច។

បើទោះបីជាយ៉ាង មានសាធារណមតិមួយចំនួន នៅតែចង់ឲ្យថៅកែក្រុមហ៊ុននេះ មានចិត្តសណ្តោប្រណៃ ដល់អតីតបុគ្គលិករបស់ខ្លួន  សម្របសម្រួលដកពាក្យបណ្តឹងលើកលែងទោសដល់រូប ដើម្បីកុំឲ្យមនុស្សម្នាក់ត្រូវបាត់បង់អនាគត ព្រោះតែលុយ ៨០ដុល្លារ៕