(កំពង់ធំ)៖ នៅរសៀលថ្ងៃទី២៣ ខែតុលា ឆ្នាំ២០២០នេះ លោកកត្តិនីតិកោសលបណ្ឌិត ងួន ញ៉ិល អនុប្រធានទី១ នៃរដ្ឋសភា អមដោយតំណាងរាស្ត្រមណ្ឌលខេត្តកំពង់ធំ សមាជិកព្រឹទ្ធសភា ថ្នាក់ដឹកនាំខេត្ត បានអញ្ជើញចុះជួបសំណេះសំណាល និងចែកអំណោយដល់ប្រជាពលរដ្ឋ ចំនួន៤០០គ្រួសារ ដែលរងគ្រោះដោយជំនន់ទឹកភ្លៀង ក្នុងឃុំក្លែង និងឃុំឈើទាល ស្រុកសណ្តាន់ ខេត្តកំពង់ធំ។

ថ្លែងនៅក្នុងពិធីចុះសាកសួរសុខទុក្ខ និងចែកអំណោយ លោក ងួន ញ៉ិល បាននាំនូវព្រះរាជបណ្តាំសាកសួរសុខទុក្ខរបស់ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ដែលព្រះអង្គទាំងទ្វេ តែងតែយកព្រះទ័យ គិតគូរពីសុខទុក្ខរបស់ប្រជាពលរដ្ឋ ក៏ដូចជាមតិផ្តាំផ្ញើសាកសួរសុខទុក្ខរបស់ថ្នាក់ដឹកនាំ រដ្ឋសភា ព្រឹទ្ធសភា ជាពិសេសពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបាននឹងកំពុងមមាញឹកក្នុងការចុះជួប និងជួយប្រជាពលរដ្ឋនៅតាមតំបន់រងគ្រោះនានា។

ឆ្លៀតក្នុងឱកាសនេះ លោក ងួន ញ៉ិល បានថ្លែងនូវកោតសរសើរដល់អាជ្ញាធរខេត្ត គ្រប់លំដាប់ថ្នាក់ កងកម្លាំងប្រដាប់អាវុធ ភាគីពាក់ព័ន្ធទាំងអស់ ដែលបានខិតខំយកអស់កម្លាំងកាយចិត្តជួយដល់ប្រជាពលរដ្ឋ និងបានសម្តែងនូវការអរគុណដល់សប្បុរសជនទាំងអស់ ដែលបានចូលរួមឧបត្ថម្ភនូវថវិកា ព្រមទាំងសម្ភារផ្សេងៗ យកមកចែកជូនប្រជាពលរដ្ឋនៅក្នុងគ្រាដ៏លំបាកនេះ។

លោក ងួន ញ៉ិល ក៏បានអំពាវនាវដល់ប្រជាពលរដ្ឋ ក្នុងពេលដែលប្រទេសកម្ពុជា កំពុងជួបគ្រោះទឹកជំនន់ សូមបងប្អូនរក្សាអនាម័យក្នុងការរស់នៅជាប់ជាប្រចាំ និងសូមប្រុងប្រយ័ត្ន និងយកចិត្តទុកដាក់ថែរក្សាសុខភាព ជាពិសេសរួមគ្នាទប់ស្កាត់ការរីករាលដាល នៃជំងឺកូវីដ១៩។

អំណោយដែលប្រជាពលរដ្ឋរងគ្រោះដោយទឹកជំនន់ ទាំង៤០០គ្រួសារទទួលបាន រួមមាន៖ អង្ករ២៥គីឡូក្រាម, មីជាតិ១កេស, ទឹកសុទ្ធ១កេស, ត្រីខកំប៉ុង១យួរ, ទឹកស៉ីអ៉ីវ១យួរ, សាប៊ូ Protex ១ប្រអប់ (៤ដុំ) និងសាប៊ូ Viso មួយគីឡូក្រាម៕