(ត្បូងឃ្មុំ)៖ សាលាដំបូង និងអយ្យការអមសាលាដំបូងខេត្តត្បូងឃ្មុំ បានចេញសេចក្ដីប្រកាសព័ត៌មានស្ដីពីលទ្ធផល១៥០ថ្ងៃ នៃការអនុវត្តយុទ្ធនាការដោះស្រាយការកកស្ទះសំណុំរឿង នៅសាលាដំបូង និងអយ្យការអមសាលាដំបូងខេត្តត្បូងឃ្មុំ។
លោក ថេង ជាង ប្រធានលេខាធិការដ្ឋានសាលាដំបូងខេត្តត្បូងឃ្មុំ និងលោក ហាក់ សៀកលីម ព្រះរាជអាជ្ញារង អមសាលាដំបូងខេត្តត្បូងឃ្មុំ បានជម្រាបជូនសាធារណជន កាលពីថ្ងៃទី១៦ ខែតុលា ឆ្នាំ២០២០ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី ខេត្ត (គ.យ.ក.ស) បានបើកកិច្ចប្រជុំ ដើម្បីពិនិត្យមើលវឌ្ឍនភាព និងលទ្ធផលរយៈពេល ១៥០ថ្ងៃ នៃការអនុវត្តយុទ្ធនាការដែលបានប្រកាសចាប់ផ្ដើមកាលពីថ្ងៃទី១៨ ខែតុលា ឆ្នាំ២០២០ កន្លងទៅ ។
លោកបានបន្តឲ្យដឹងថា៖ កិច្ចប្រជុំនេះប្រព្រឹត្តទៅក្រោមអធិបតីភាពរបស់លោក កើត រិទ្ធ រដ្ឋមន្ត្រីក្រសួងយុត្តិធម៌ និងប្រធាន គ.យ.ក.ស និងមានការចូលរួមពីថ្នាក់ដឹកនាំ ក្រសួងយុត្តិធម៌ ប្រធានសាលាដំបូង ព្រះរាជអាជ្ញានៃអយ្យការអមសាលាដំបូង និងប្រធានលេខាពិការដ្ឋានរដ្ឋបាលសាលាដំបូង ទូទាំងប្រទេស។
ហើយជាលទ្ធផលសាលាដំបូង និងអយ្យការអមសាលាដំបូង ខេត្តត្បូងឃ្មុំ បានដោះស្រាយសំណុំរឿងព្រហ្មទណ្ឌចាស់ដែលកកស្ទះនៅដំណាក់កាលអយ្យការ, ដំណាក់កាលស៊ើបសួរ និងដំណាក់កាលជំនុំជម្រះមានចំនួនសរុប ៦៣៨ សំណុំរឿង ស្មើនឹង១០០% នៃសំណុំរឿងព្រហ្មទណ្ឌកកស្ទះ (សំណុំរឿងដែលត្រូវបានជំនុំជម្រះរួច មានចំនួន១៦៦ សំណុំរឿង ស្មើនឹង១០០%នៃសំណុំរឿងទាំងអស់ក្នុងដំណាក់ការជំនុំជម្រះ)។
បន្ថែមពីនេះសាលាដំបូង និងអយ្យការអមសាលាដំបូង ខេត្តត្បូងឃ្មុំ ដោះស្រាយសំណុំរឿងព្រហ្មទណ្ឌថ្មី មានចំនួនសរុប ៧៣៤សំណុំរឿង ស្មើនឹង ៧៨% នៃសំណុំរឿងព្រហ្មទណ្ឌថ្មី (សំណុំរឿងព្រហ្មទណ្ឌថ្មីដែលត្រូវបានជំនុំជម្រះរួច មានចំនួន ៣១០សំណុំរឿង ស្មើនឹង ៧៣% នៃសំណុំរឿងទាំងអស់ក្នុងដំណាក់ការជំនុំជម្រះ)។ ជាមួយនឹងលទ្ធផលនេះ គ.យ.ក.ស ក៏បានប្រកាសអំពីការជោគជ័យ នៃការអនុវត្តយុទ្ធនាការដល់សាលាដំបូង និងអយ្យការអមសាលាដំបូងខេត្តត្បូងឃ្មុំផងដែរ ។
ទន្ទឹមនេះដែរ សាលាដំបូង និងអយ្យការអមសាលាដំបូង ខេត្តត្បូងឃ្មុំ សូមថ្លែងអំណរគុណយ៉ាងជ្រាលជ្រៅបំផុតចំពោះ ក្រសួងយុត្តិធម៌ ដែលបានរៀបចំឯកសារជំនួយស្មារតីស្ដីពី យុទ្ធនាការ, សេចក្ដីណែនាំស្ដីពីគោលការណ៍ ដែលត្រូវអនុវត្តយុទ្ធនាការ និងបង្កើតគណៈកម្មការដឹកនាំយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី ខេត្ត (គ.យ.ក.ស) និងក្រុមទី២ នៃ គ.យ.ក.ស ដែលបានចង្អុលបង្ហាញ លើកទឹកចិត្ត ជួយជ្រោមជ្រែង និងដោះស្រាយនូវបញ្ហាប្រឈមនានា ព្រមទាំងសូមថ្លែងអំណរគុណដល់ គណៈកម្មការឯកភាពខេត្ត ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា មន្ត្រីលេខាធិការដ្ឋានរដ្ឋបាល មន្ត្រីនគរបាលយុត្តិធម៌ មន្ទីរ-អង្គភាពជុំវិញខេត្ត ព្រមទាំងបណ្ដាស្ថាប័ន និងអង្គភាពពាក់ព័ន្ធផ្សេងទៀត ដែលបានចូលរួមយ៉ាងសកម្មប្រកបដោយឆន្ទៈ និងស្មារតីទទួលខុសត្រូវខ្ពស់ ក្នុងការជម្រុញការអនុវត្តយុទ្ធនាការដោះស្រាយការកកស្ទះសំណុំរឿងនៅសាលាដំបូង និងអយ្យការអមសាលាដំបូងទាំងមូល។
បន្ថែមពីនេះទៀត សាលាដំបូង និងអយ្យការអមសាលាដំបូង ខេត្តត្បូងឃ្មុំ សូមបន្តប្ដេជ្ញាចិត្តយ៉ាងមោះមុតថា នឹងខិតខំប្រឹងប្រែងអនុវត្ត តួនាទី ភារកិច្ច ប្រកបដោយឆន្ទៈ និងការទទួលខុសត្រូវខ្ពស់ ដើម្បីសម្រេចបានជោគជ័យលើការងារថ្មីៗបន្ថែមទៀត ដោយប្រកាន់ខ្ជាប់នូវអភិរក្សក្រមការងារក្នុងយុទ្ធនាការគឺ «លឿន ត្រឹមត្រូវ យុត្តិធម៌ និងមិនពុករលួយ»៕
