(ត្បូងឃ្មុំ)៖ ស្នងការនគរបាលខេត្តត្បូងឃ្មុំ លោកឧត្តមសេនីយ៍ ម៉ៅ ពៅ បានបញ្ជាក់ដល់អង្គភាព Fresh News ថា នៅរសៀលថ្ងៃទី០៤ ខែកុម្ភ: ឆ្នាំ២០១៦នេះ លោកបានដឹកនាំកម្លាំងនគរបាលជាច្រើននាក់ ចុះទៅបង្ក្រាបសង្វៀនជល់មាន់ ហេងហេងអន្លង់ជ្រៃ ក្រោយម្ចាស់សង្វៀននៅតែព្រហើនបើកលេងបន្តទៀត បើទោះបីសមត្ថកិច្ចបានកោះហៅឲ្យបញ្ឈប់ក៏ដោយនោះ។
លោកឧត្តមសេនីយ៍ស្នងការ បានបញ្ជាក់ថា ជាលទ្ធផលយើងបានឃាត់ខ្លួនមនុស្ស២១នាក់ ម៉ូតូ១៤គ្រឿង រថយន្ត១៦គ្រឿង និងមាន់ជាក់ស្តែង១៤មាន់ ហើយមាន់ដែលនៅក្នុងទ្រុងមានជាង១០០ក្បាលឯណោះ ។
សម្រាប់មនុស្ស និងវត្ថុតាងទាំងនេះ សមត្ថកិច្ចកំពុងបន្តសួរនាំ និងសុំគោលការណ៍ពីព្រះរាជអាជ្ញា និងអភិបាលខេត្តដើម្បីចាត់ការតាមនីតិវិធី។
សូមបញ្ជាក់ថា សេចក្ដីរាយការណ៍ពីភ្នាក់ងារ Fresh News ដែលបានទៅអើតមើលនៅក្នុងបរិវេណកាស៊ីណូ ហេងហេង អន្លង់ជ្រៃ គិតត្រឹមម៉ោងជាង ១២ថ្ងៃត្រង់ ទី០៤ ខែកុម្ភៈ ឆ្នាំ២០១៦នេះ បានឲ្យដឹងថា សង្វៀនជល់មាន់នៅតែបន្តបើកលេងជាធម្មតា ហើយភ្ញៀវជាង៩០% គឺជាជនជាតិខ្មែរចូលលេងដដែលដោយមានជនជាតិវៀតណាមចូលលេងតិចតួចប៉ុណ្ណោះ។
តាមសេចក្ដីរាយការណ៍ពីភ្នាក់ងារ Fresh News បានឲ្យដឹងថា នៅកាស៊ីណូ ហេងហេង អន្លង់ជ្រៃ ដែលគេអះអាងថា មានច្បាប់នេះគឺមានបើកលេងបៀរ អាប៉ោង ហ្គេមបាញ់ត្រី ជាពិសេសជល់មាន់តែម្ដង។ ក្នុងនោះល្បែងបៀរ អាប៉ោង និងហ្គេមគឺជាល្បែងដែលគេបើកលេងកំដរបន្ទាប់បន្សំប៉ុណ្ណោះ តែអ្វីដែលសំខាន់អាចធ្វើឲ្យកាស៊ីណូនេះ រកចំណូលបានច្រើននោះ គឺការបើកសង្វៀនជល់មាន់តែម្ដង ព្រោះនៅកាស៊ីណូនេះមិនសូវមានជនជាតិវៀតណាម ចូលមកលេងឡើយ តែសម្បូរជនជាតិខ្មែរចូលទៅចាក់ភ្នាល់ជល់មាន់ដោយអ្នកជល់មានខ្លះទៅតាំងពីភ្នំពេញ ពីខេត្តព្រៃវែង ស្វាយរៀង កំពង់ចាមក៏មានដែរ។
ចំណែកល្បែងផ្សេងៗទៀត ពលរដ្ឋខ្មែរមិនចូលចិត្តលេងដោយគេយល់ថា កូនចាក់មិនងាយឈ្នះមេ តែសម្រាប់អ្នកចូលចិត្តជល់មាន់វិញគេយល់ថា ចាក់ឈ្នះចាញ់ឃើញជាក់ស្ដែង ហើយបានមើលសប្បាយភ្នែកទៀត។
យោងតាមច្បាប់ស្ដីពីល្បែងស៊ីសង និងបំរាមរបស់រាជរដ្ឋាភិបាល គឺមិនអនុញ្ញាតឲ្យជនជាតិខ្មែរចូលលេងល្បែងនៅតាមកាស៊ីណូនោះទេ គឺអនុញ្ញាតឲ្យតែជនបរទេសប៉ុណ្ណោះ។ ប៉ុន្តែបច្ចុប្បន្ននេះ ដោយសារតែជនជាតិខ្មែរសម្បូរលុយ និងលេងធំជាងជនបរទេស ទើបម្ចាស់កាស៊ីណូ និងមន្ត្រីអាជ្ញាធរមានសមត្ថកិច្ចឃុបឃិតគ្នាបិទភ្នែក ឲ្យចូលលេងតាមចិត្ត ក្នុងនោះ រាល់សង្វៀនជល់មាន់ដែលជ្រកក្រោមស្លាកកាស៊ីណូ ដូចជា នៅកាស៊ីណូ ហេងហេង អន្លង់ជ្រៃ ខាងលើជាឧទាហរណ៍ស្រាប់គឺជាង៩០ភាគរយ នៃអ្នកចូលទៅចាក់ភ្នាល់ មាន់ជល់គឺជាជនជាតិខ្មែរ៕
Posted by Fresh News Photo on Thursday, February 4, 2016
