(ភ្នំពេញ)៖ បក្ខពួកក្រុមចោរវាយប្លន់យកម៉ូតូ ដែលនៅសេសសល់នៅអាណាចក្រខណ្ឌឫស្សីកែវ២នាក់ ត្រូវបានកម្លាំងនគរបាលប៉ុស្ដិ៍ឫស្សីកែវ ខណ្ឌឫស្សីកែវ​តាមចាប់ខ្លួនបាន​បន្ថែមទៀត នៅយប់​ថ្ងៃទី០៣ ខែកុម្ភៈ ឆ្នាំ២០១៦ ស្ថិតនៅចំណុចលើសួនច្បារ​សូគីម៉ិច តាមបណ្ដោយផ្លូវជាតិលេខ៥ ក្រុម៤ ភូមិឃ្លាំងសាំង សង្កាត់ឬស្សីកែវ ខណ្ឌឫស្សីកែវ ក្រោយពីជនសង្ស័យ​៥នាក់ ត្រូវបានចាប់ខ្លួន​ពាក់ព័ន្ធនឹងការធ្វើសកម្មភាព នៅថ្ងៃទី៦ ខែមករា ឆ្នាំ២០១៦កន្លងទៅ។

មន្ត្រីនគរបាលខណ្ឌឫស្សីកែវបានបញ្ជាក់ថា ជនសង្ស័យទី១ឈ្មោះ ដួង ដាវីត ហៅ វីត អាយុ១៨ឆ្នាំ និង២ឈ្មោះហាក់ វាសនា ហៅអាង៉ោ អាយុ១៨ឆ្នាំ ពួកគេជាមុខសញ្ញាទី៦ និងទី៧ ដែលត្រូវចាប់ខ្លួន ក្រោមបទចោទប្រកាន់ពីបទ​ផ្សំគំនិតវាយប្លន់​យកម៉ូតូ​របស់ប្រជាពលរដ្ឋ ក្នុងទឹកដីខណ្ឌឫស្សីកែវ កន្លងមកជាមួយនិងបក្ខពួក៥នាក់ទៀត។

បច្ចុប្បន្នជនត្រូវជាប់សង្ស័យវាយប្ល់យកម៉ូតូទាំង២នាក់ កំពុងឃុំខ្លួនបណ្ដោះអាសន្ននៅអធិការដ្ឋាន នគរបាលខណ្ឌឫស្សីកែវ ដើម្បីបន្តនីតិវិធីកសាង​សំណុំរឿង​បញ្ជូនខ្លួន​ទៅសាលាដំបូង​រាជធានីភ្នំពេញ​ចាត់ការតាមច្បាប់៕