(ភ្នំពេញ)៖ នាព្រឹកថ្ងៃចន្ទ ទី១២ ខែតុលា ឆ្នាំ២០២០ នៅមូលដ្ឋានកងរាជអាវុធហត្ថខណ្ឌដូនពេញ រាជធានីភ្នំពេញ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងលោក ឃួង ស្រេង អភិបាលរាជធានីភ្នំពេញ បានអញ្ជើញជាគណៈអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាល មូលដ្ឋានកងរាជអាវុធហត្ថខណ្ឌដូនពេញ។

លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានថ្លែងថា មុននឹងឈានទៅដល់ការកសាងអគាររដ្ឋបាលខណ្ឌ ដូនពេញ និងខណ្ឌ៧មករា បានផ្តើមចេញពីការជួសជុលកែលំអ កសាងថ្មី ហេដ្ឋារចនាសម្ពន្ធទីបញ្ជាការ កងរាជអាវុធហត្ថរាជធានីភ្នំពេញ ជាបន្តបន្ទាប់ក្នុងរយៈកាលកន្លងមក និងយកជាគំរូ កែលំអ កសាងថ្មី នៅតាមបណ្តាមូលដ្ឋានកងរាជអាវុធហត្ថ ខណ្ឌទាំង១៤ ឱ្យមានការឯកភាពគ្នាតាមគំរូ និងស្ទង់ដាតែមួយ។

លោក ឃួង ស្រេង បានកោតសរសើរចំពោះកងរាជអាវុធហត្ថរាជធានីភ្នំពេញ ដែលបានរួមចំណែកយ៉ាងសកម្ម ក្នុងការការពាររាជរដ្ឋាភិបាលស្របច្បាប់រក្សាស្ថេរភាពនយោបាយ ប្រឆាំងទប់ស្កាត់រាល់ឧបាយកលប៉ុនប៉ងបង្កវិទ្ធង្សនា បដិវត្តពណ៌ បង្រ្កាបបទល្មើសព្រហ្មទណ្ឌគ្រប់ប្រភេទ ការពារអាយុជីវិត ទ្រព្យសម្បត្តិ ប្រជាពលរដ្ឋ រក្សាសុវត្ថិភាពនិងសណ្តាប់ធ្នាប់ ក្នុងមូលដ្ឋានរាជធានីភ្នំពេញ និងបានខិតខំកសាងនូងសំណង់ អគាររដ្ឋបាល កន្លែងធ្វើការបានសមរម្យនិងមានស្ទង់ដាតែមួយ។

ក្នុងនេះដែរនាយឧត្តមសេនីយ៍ សៅ សុខា បានលើកឡើងថា អគារនេះ និងដើរតួនាទីយ៉ាងសំខាន់សម្រាប់កម្លាំងកងរាជអាវុធហត្ថខណ្ឌ ក៏ដូចជាកងរាជអាវុធហត្ថរាជធានីភ្នពេញ ស្នាក់នៅ ធ្វើការ ដើម្បីរួមជាមួយ និងអាជ្ញាធរកងកម្លាំងមានសមត្ថកិច្ចប្រតិបត្តិនូវតួនាទី ភារកិច្ច ក្នុងការការពារសន្តិសុខ សណ្តាប់ធ្នាប់ ពង្រឹងការអនុវត្តច្បាប់ កសាងនីតិរដ្ឋនៅព្រះរាជាណាចក្រកម្ពុជា។

នាយឧត្តមសេនីយ៍ ក៏បានថ្លែងនូវអំណរគុណលោក ឃួង ស្រេង អភិបាលរាជធានីភ្នំពេញ សាលារាជធានីភ្នំពេញ សាលាខណ្ឌដូនពេញ ដែលបានផ្តល់ទីតាំងនិងគាំទ្រដល់ដំណើរសាងសង់ និងថ្លែងនូវការកោតសរសើរ ឧត្តមសេនីយ៍ឯក រ័ត្ន ស្រ៊ាង ដែលបានដឹកនាំកៀងគរចលនាសប្បុរសជន ប្រមូលមូលិធិសម្រាប់ដំណើរការ ការសាងសង់សំណង់នេះ និងថ្លែងនូវអំណរគុណ យ៉ាងជ្រាលជ្រៅចំពោះសប្បុរសជន ដែលបានបរិច្ចាកថវិកា ទ្រព្យសម្បតិ្តផ្ទាល់ខ្លួន ជួយឧបត្ថម្ភ ធ្វើអោយសំណង់មួយនេះ បានកកើតឡើងជារូបរាងពិតប្រាកដ ព្រមទាំងជូនពរដល់ លោកលោកស្រី លោកឧកញ៉ា លោក លោកស្រីទាំងអស់សូមប្រកបដោយ សុខភាពល្អ បរិបូរ សុភមង្គល និងទទួលបានជោគជ័យគ្រប់ភារកិច្ច ព្រមទាំងចំរ៉ុងចំរើនក្នុងការប្រកបរបរអាជីវកម្ម។

នាយឧត្តមសេនីយ៍ សៅ សុខា បានបន្តថា ដើម្បីអនុវត្តតួនាទី ភារកិច្ច មេបញ្ជាការកងរាជអាវុធហត្ថលើផ្ទៃប្រទេស បានដាក់ចេញនូវកិច្ចការអាទិភាព៧ ធ្វើជាមូលដ្ឋានសម្រាប់ធ្វើសកម្មភាពរួមមាន៖

*ទី១៖ ការហូបចុក
*ទី២៖ ស្លៀកពាក់
*ទី៣៖ ការសាងសង់សំណង់អគារសម្រាប់ស្នាក់នៅ ធ្វើការរៀនសូត្រ
*ទី៤៖ ការថែទាំសុខភាព
*ទី៥៖ ការអប់ររំ ហ្វឹកហ្វឺន និងរៀនសូត្រ
*ទី៦៖ ការធានាមធ្យោបាយធ្វើដំណើរឧបករណ៍ សម្ភារ គ្រឿងបំពាក់
*ទី៧៖ កំសាន្ត លំហែរ និងគោលនយោបាយសរសើរ លើកទឹកចិត្ត ព្រមទាំងដោះស្រាយនៅពេលជួបទុក្ខលំបាក។

ពិធីដែលកំពុងដែលប្រារព្ធនាពេលនេះ ស្ថិតនៅក្នុងការងារអាទិភាពទី៣ ដូច្នេះគ្មានការងារដែលកងរាជអាវុធហត្ថ ធ្វើហើយគ្មានផែនការ ឬគ្មានការគិតទុកជាមុននោះទេ។

ជាមួយគ្នានេះ នាយឧត្តមសេនីយ៍មេបញ្ជាការ បានរំលឹកដល់កងរាជអាវុធហត្ថខណ្ឌដូនពេញ ក៏ដូចជាកងរាជអាវុធហត្ថទូទាំងប្រទេស រួមមាន៖

*ទី១៖ ទំរាំកសាងនូវអគារមួយនេះឡើង ពិតជាលំបាកចំណាយពេលវេលានិងថវិកា ដោយមានការចូលរួមជាច្រើនប្រភព សូមអស់លោកយកចិត្តទុកដាក់ថែទាំ និងប្រើប្រាស់បានយូរអង្វែង

*ទី២៖ ត្រូវបន្តខិតខំប្រឹងប្រែងថែមទៀត ក្នុងការអនុវត្តតួនាទី ភារកិច្ច ពិសេសត្រូវតាមដាននិងក្តាប់ជាប់នូវពត៌មានប្រែប្រួលការងារអប់រំ ពង្រឹងការងារនីតិវិធី ធ្វើជាគំរូល្អក្នុងការគោរពវិន័យកងទ័ព គំរូក្នុងការប្រតិបត្តិច្បាប់ ប្រកាន់ខ្ជាប់ក្រមសីលធម៌វិជ្ជាជីវៈ និងប្តេជ្ញាការពារដាច់ខាត ច្បាប់រដ្ឋធម្មនុញ្ញ
*ទី៣៖ ទោះបីកម្ពុជាការពារបាននូវការរាលដាលជំងឺកូវីដ១៩ ក៏ដោយត្រូវបន្តគោរពនូវវិធានប្រយុទ្ធប្រឆាំងកូវីដ១៩ តបតាមការក្រើនរំលឹករបស់សម្តេចតេជោប្រមុខរាជរដ្ឋាភិបាល និងក្រសួងសុខាភិបាល បន្តអនុវត្តអាវុធហត្ថម្នាក់ៗ សុវត្ថិភាព បន្ទាយសុវត្ថិភាព គ្រួសារសុវត្ថិភាព សង្គមទាំងមូលសុវត្ថិភាព
*ទី៤៖ យកចិត្តទុកដាក់ចុះបញ្ជីដីធ្លី និងធ្វើបណ្ណសំគាល់អចលនទ្រព្យ តាមការណែនាំរបស់ក្រសួងការពារជាតិ
*ទី៥៖ បន្តអនុវត្តនូវពាក្យស្លោក ជួយគិត ជួយធ្វើ និងរួមគ្នាទទួលខុសត្រូវ និងទិសស្លោក ចំពោះប្រទេសជាតិ ត្រូវតែការពារ ប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប។ ដើម្បីរួមចំណែកក្នុងការចំណាយសាងសង់នេះ នាយឧត្តមសេនីយ៍ សៅ សុខា និងចលនារកការគាំទ្រថវិកាចំនួន១០ម៉ឺនដុល្លារ ដើម្បីរួមចំណែកក្នុងការកសាងនៅថ្ងៃនេះ៕