(ពោធិ៍សាត់)៖ នៅថ្ងៃទី១២ ខែតុលា ឆ្នាំ២០២០ លោក ឃៀង សុជីវ័ន្ត តំណាងលោកឧកញ៉ាបណ្ឌិត ទ្រី ភាព អគ្គនាយកក្រុមហ៊ុន អឹម ឌី អេស ហេងហ៊ីថ្មដា បាននាំយកអំណោយ របស់សម្តេចតេជោ ហ៊ុន សែន តាមរយៈលោកឧកញ៉ា បណ្ឌិត ទ្រី ភាព និងលោកស្រី គៀន ស្រីនាង ជូនរដ្ឋបាលខេត្តពោធិ៍សាត់ ដើម្បីចូលរួមចំណែកដោះស្រាយបញ្ហាគ្រោះទឹកជនន់ ដែលបាននិងកំពុងយាយីប្រជាពលរដ្ឋនៅក្នុងខេត្ត។
អំណោយទាំងនោះរួមមាន៖
* អង្ករ ២០តោន
* មីម៉ាម៉ាខ្មែរ១៥០កេះធំ ស្មើ ៩០០កេះតូច
* ត្រីខកំប៉ុង ៥០កេះធំ ស្មើ ៥០០០កំប៉ុង
* ថវិកា ៦.០០០.០០០រៀល។ សរុបជាថវិកាចំនួន ២០.០០០ ដុល្លារ ជូនដល់រដ្ឋបាលខេត្តពោធិ៍សាត់ ដើម្បីចែកជូនដល់បងប្អូនប្រជាពលរដ្ឋ កំពុងទទួលរងគ្រោះដោយសារទឹកជំនន់យ៉ាងខ្លាំងក្នុងខេត្តពោធិ៍សាត់។
លោក ឃៀង សុជីវ័ន្ត បានលើកឡើងពីប្រសាសន៍សម្តេចតេជោថា «សូមបងប្អូនប្រជាពលរដ្ឋមានការប្រុងប្រយ័ត្នខ្ពស់ចំពោះជំនន់ទឹកភ្លៀង» ដូច្នេះហើយលោកឧកញ៉ាបណ្ឌិត ទ្រី ភាព និងលោកស្រី បាននាំអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត មកផ្តល់ជូនសាលាខេត្តពោធិ៍សាត់ ដើម្បីចាត់ចែងបន្តជូនជនរងគ្រោះដោយសារទឹកជំនន់។
