(ភ្នំពេញ)៖ អង្គការយូណេស្កូនៅថ្ងៃទី០៨ ខែតុលា ឆ្នាំ២០២០នេះ បានចាប់ផ្តើមយុទ្ធនាការបែបសិល្បៈមួយ ដើម្បីលើកកម្ពស់នូវកិច្ចសន្ទនាជាលក្ខណៈអន្តរវប្បធម៌ ការយោគយល់អធ្យាស្រ័យគ្នាទៅវិញទៅមក ដើម្បីជំទាស់នឹងការរើសអើងជនបរទេស ការម៉ាក់ងាយ និងព័ត៌មានមិនពិត ហើយពង្រឹងការរួបរួមក្នុងសង្គម និងការផ្សះផ្សា ដើម្បីជម្នះពេលវេលាដ៏លំបាកក្នុងអំឡុងនៃការរីករាលដាលដោយជំងឺកូវីដ១៩ នៅជុំវិញពិភពលោក តាមរយៈយុទ្ធនាការបែបសិល្បៈ ដោយប្រើប្រាស់គំនូរដោយដីស ជាមធ្យោបាយក្នុងការចាប់ផ្តើមនូវកិច្ចសន្ទនាក្នុងសង្គមកម្ពុជា។
យោងទៅតាមតំណាងរបស់អង្គការយូណេស្កូ លោក Sardar Umar Alam បានលើកឡើងថា «ជំងឺកូវីដ១៩ បានប៉ះពាល់ដល់មនុស្សជាតិទាំងមូល និងធ្វើឱ្យធ្លាក់ចុះនូវ សីលធម៌ និងវិសមភាព នៅក្នុងសហគមន៍។ ជំងឺនេះមិនបានប្រកាន់ពូជសាសន៍នោះទេ ប៉ុន្តែវាមានផលប៉ះពាល់ជាច្រើន។ យើងឃើញមានការលេចឡើង នូវ ពាក្យសម្តី ដែលបង្កប់ដោយភាពស្អប់ខ្ពើម និងការកំណត់គោលដៅមិនស្មើគ្នាទៅលើក្រុមងាយរងគ្រោះ និងសហគមន៍មួយចំនួន ក្នុងដំណាក់កាលដ៏លំបាកនេះសាមគ្គីភាព និងការទទួលខុសត្រូវដោយស្មើភាព គឺជាកត្តាដ៏សំខាន់ក្នុងការពង្រឹងនូវសង្គមដ៏រឹងមាំមួយ ដើម្បីប្រឆាំងនឹងសត្រូវ រួមរបស់មនុស្សជាតិ តាមរយៈការយោគយល់ សហការ និងទំនុកចិត្ត ដែលចាំបាច់គិតពីសិទ្ធិមនុស្សជាចម្បង»។
អង្គការយូណេស្កូ ក្នុងកិច្ចសហប្រតិបត្តិការជាមួយនឹងក្រុមហ៊ុន ហាវ៉ាស់ សាំប៉ាញ បានសម្រេចជ្រើសរើសសិល្បករជនជាតិខ្មែរ-បារាំង ពីស្ទូឌីយោបាសាក់ គឺលោកស្រី អេននី (Annie) និងលោក ថមមី (Thommy) ដើម្បីបង្កើតសិល្បៈគំនូរដីស នៅមុខការិយាល័យអង្គការយូណេស្កូ ជាប់ព្រះបរមរាជវាំង។
លោក Thommy បានឱ្យដឹងថា នេះជាកិត្តិយសក្នុងការចូលរួមជាមួយយុទ្ធនាការដ៏មានសារៈសំខាន់នេះ ហើយជឿជាក់ថាសិល្បៈជាការផ្សារភ្ជាប់មនុស្ស និងមនុស្ស មិនថាពួកគេជាជនជាតិអ្វី មានសាវតារឬជំនឿបែបណានោះទេ។ យើងសង្ឃឹមថាទម្រង់នៃសិល្បៈដីសនេះ នឹងជួយមនុស្សឱ្យនិយាយដោយបើកចំហជាមួយគ្នា ថាពួកយើងមានបេះដូង និងទឹកចិត្តតែមួយ។
ចំណែកលោក អ៊ុង ដាណិត ជានាយកគ្រប់គ្រងទូទៅនៃក្រុមហ៊ុន ហាវ៉ាស់ សំប៉ាញ បានបញ្ជាក់ថា យើងគ្រប់គ្នាសុទ្ធតែចង់រស់នៅប្រកបដោយសុវត្ថិភាព និងមាន សុខភាពល្អ ហើយពិតណាស់គឺយើងចង់កម្ចាត់វីរុសមួយនេះចេញពីពិភពលោក។ មិនត្រឹមតែវីរុសកូរ៉ូណាទេ តែយើងក៏ចង់កម្ចាត់នូវវីរុសនៃសេចក្តីស្អប់ និងការរើសអើង មិនថាពីប្រទេសកម្ពុជា ឬក៏ទូទាំងពិភពលោកនោះទេ។
សិល្បៈនៃគំនូរដោយដីសនៅលើដីមានអមដោយរូបផ្កា និងពាក្យពេចន៍មួយចំនួនទាំងភាសាខ្មែរ និងអង់គ្លេស រួមទាំងស្លាកសញ្ញាមួយចំនួន ដែលយើងជ្រើសយកមក គឺដើម្បីបង្ហាញពីផលវិបាក សកម្មភាព ឬអាកប្បកិរិយាបែបវិជ្ជមាន។ ចំពោះអត្ថន័យនៃរូបផ្កាវិញ គឺចង់បង្ហាញពីភាពផុយស្រួយនៃជីវិត និងការរីកសាយភាយនៃវីរុស នៅក្នុងខ្យល់។ ផ្ទៃជារង្វង់ និងគ្រាប់ពូជផ្កា គឺបង្ហាញពីធាតុសំខាន់ពីរនៃស្លាកសញ្ញារបស់យុទ្ធនាការរបស់យើង ដោយក្នុងនោះមានរូបតំណាងឱ្យបេះដូង ដើម្បីបង្កើត ឈ្មោះយុទ្ធនាការ «បើកបេះដូងអ្នក»។
លោកសង្ឃឹមថា ពាក្យពេចន៍សាមញ្ញៗ និងងាយស្រួយ រួមទាំងស្លាកសញ្ញា រូបតំណាង នឹងផ្តល់ភាពងាយស្រួលដល់សហគមន៍ក្នុងការឈ្វេងយល់បន្ថែម និងចូលរួមជាមួយនឹងយុទ្ធនាការនេះ។ ធម្មជាតិរបស់ដីសគឺងាយនឹងរលុប ដូច្នេះយើងសង្ឃឹមថាផលប៉ះពាល់អវិជ្ជមានចំពោះសង្គម ដែលបណ្តាលមកពីជំងឺកូវីដ១៩ នឹងរសាត់បាត់ទៅ នៅចុងបញ្ចប់នៃរដូវវស្សានេះ។
ជាមួយនឹងយុទ្ធនាការបែបសិល្បៈ ដើម្បីពង្រឹងនូវការរួបរួមសង្គម និងការផ្សះផ្សាសហគមន៍ អង្គការយូណេស្កូ បានបង្កើតនូវយុទ្ធនាការលើប្រព័ន្ធផ្សព្វផ្សាយសង្គម #DontGoViral ដោយក្នុងនោះបានអញ្ជើញសិល្បការិនីកម្ពុជាចំនួន ៤រូប និងក្រុមសិល្បៈដែលកំពុងពេញនិយម ចំនួន១ក្រុម ដើម្បីចែករំលែកទៅកាន់សាធារណជន អំពីការកើនឡើងនូវព័ត៌មានមិនពិតជាច្រើននៅលើអ៊ីនធឺណិត ក្នុងអំឡុងពេលកូវីដ១៩នេះ។
តាមរយៈយុទ្ធនាការរបស់អង្គការយូណេស្កូ អ្នកប្រើប្រាស់ប្រព័ន្ធផ្សព្វផ្សាយសង្គមកម្ពុជាជាង ៣០ម៉ឺននាក់ បានចូលរួមក្នុងការឈ្វេងយល់ពីការទទួលបាន នូវព័ត៌មាន ពិតដែលអាចជឿទុកចិត្តបានទាន់ពេលវេលា ហើយប្រើប្រាស់និងចែករំលែកព័ត៌មានទាំងនោះប្រកបដោយការពិចារណា។ គំនិតផ្តួចផ្តើមទាំងអស់នេះ គឺជាផ្នែកមួយ នៃកិច្ចការដែលអង្គការយូណេស្កូកំពុងធ្វើ ដើម្បីពង្រឹងនូវសេរីភាពនៃការបញ្ចេញមតិ និងប្រព័ន្ធអេកូឡូស៊ីផ្នែកអភិវឌ្ឍន៍ប្រព័ន្ធផ្សព្វផ្សាយក្នុងប្រទេសកម្ពុជា៕
