(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា សម្តេចនឹងអញ្ជើញបើកការដ្ឋានសាងសង់ផ្លូវទាំង៣៨ខ្សែ ក្នុងក្រុងសៀមរាប នាខែវិច្ឆិកា ឆ្នាំ២០២០ខាងមុខនេះ។
ការប្រកាសនេះបានធ្វើឡើងនៅព្រឹកថ្ងៃពុធ ទី០៧ ខែតុលា ឆ្នាំ២០២០ ក្នុងឱកាសសម្តេចអញ្ជើញសម្ពោធមជ្ឈមណ្ឌលកម្សាន្តខ្នាតយក្សនៅកម្ពុជា «ព្រីនស៍ ម៉ាណ័រ» ស្ថិតនៅតាមបណ្តោយផ្លូវជាតិលេខ១ គីឡូម៉ែត្រលេខ២៤ ភូមិដីឥដ្ឋកោះផុស២ ឃុំដីឥដ្ឋ ស្រុកកៀនស្វាយ ខេត្តកណ្តាល។
សម្តេចតេជោ ហ៊ុន សែន មានប្រសាសន៍បញ្ជាក់យ៉ាងដូច្នេះថា៖ «រាជរដ្ឋាភិបាល នឹងទម្លាក់លុយ១៥០លានដុល្លារ ចុះទៅខេត្តសៀមរាប ដើម្បីធ្វើផ្លូវ៣៨ខ្សែ។ (ផលប្រយោជន៍) ទី១៖ បានហេដ្ឋារចនាសម្ព័ន្ធទីក្រុងទេសចរណ៍ ដែលខែវិច្ឆិកា ខ្ញុំនឹងទៅបើកការដ្ឋានសាងសង់។ (ផលប្រយោជន៍ទី២) ប្រាក់ ១៥០លានដុល្លារនេះ ក៏មានមួយភាគធំបានទៅលើកម្លាំងពលកម្ម នៃកម្មករ-កម្មការិនី និងប្រជាពលរដ្ឋដែលចូលរួមធ្វើផ្លូវ»។
សូមជម្រាបថា រាជរដ្ឋាភិបាលកម្ពុជា កាលពីព្រឹកថ្ងៃទី០៤ ខែកញ្ញា ឆ្នាំ២០២០កន្លងទៅ បានសម្រេចបញ្ចេញកញ្ចប់ថវិកាចាប់ពី ១០០-១៥០លានដុល្លារអាមេរិក សម្រាប់អនុវត្តគម្រោងអភិវឌ្ឍន៍ហេដ្ឋារចនាសម្ពន្ធផ្លូវចំនួន ៣៨ខ្សែ នៅក្នុងក្រុងសៀមរាប ក្នុងគោលដៅលើកកម្ពស់ការបម្រើសេវាជូនប្រជាពលរដ្ឋ និងភ្ញៀវទេសចរនៅក្នុងក្រុងសៀមរាប និងធ្វើឱ្យក្រុងសៀមរាប ក្លាយទៅជាទីក្រុងទេសចរណ៍កម្រិតពិភពលោក។
ផ្លូវដែលត្រូវធ្វើការស្ថាបនា និងកែលម្អឡើងវិញទាំងអស់នោះ នឹងត្រូវធ្វើឱ្យក្លាយទៅជាផ្លូវដែលមានមេត្រីភាពជាមួយវប្បធម៌ ប្រវត្តិសាស្រ្ត និងទេសចរណ៍ ដោយស្របតាមរូបសាស្រ្តទីក្រុង និងត្រូវមានការគិតគូរជាប្រព័ន្ធលើគ្រប់ទិដ្ឋភាព ដូចជា ប្រព័ន្ធលូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវសម្រាប់ជនពិការ ផ្លូវជិះកង់ ចំណតរថយន្ត ប្រព័ន្ធភ្លើងបំភ្លឺផ្លូវសាធារណៈ ផ្លាកសញ្ញា និងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាងចម្រោះទឹកកខ្វក់ សួនច្បារ និងសួនដាំដើមឈើជាដើម។
សម្តេចតេជោ ហ៊ុន សែន បានថ្លែងទៀតថា នៅថ្ងៃទី០៦ ខែតុលា ឆ្នាំ២០២០ សម្តេចក៏បានសម្រេចឱ្យសាងសង់ផ្លូវចំនួន៣គម្រោងទៀត រួមមាន៖ ផ្លូវលេខ៤១ តភ្ជាប់ពីផ្លូវលេខ៤ ទៅកំពត, ផ្លូវលេខ៣១ និងផ្លូវលេខ៣៣ នៅខេត្តកំពតផងដែរ។ គម្រោងទាំងនេះ នឹងសុំខ្ចីថវិកាពីរដ្ឋាភិបាលចិន។
សម្តេចតេជោ ហ៊ុន សែន បានអរគុណដល់រដ្ឋាភិបាលចិន ដែលបានជួយកសាងផ្លូវ និងស្ពាននៅកម្ពុជា។ សម្តេចតេជោ ថែមទាំងបានសម្តែងការហួសចិត្តចំពោះការលើកឡើងមួយចំនួនដែលថា កម្ពុជាចាប់ចិន និងរណបចិន ហើយបោះបង់មហាអំណាចដទៃ។
ក្នុងលក្ខខណ្ឌនេះ សម្តេចតេជោ ហ៊ុន សែន ចោទសួរវិញថា «បើចិនមិនជួយសាងសង់ហេដ្ឋារចនាសម្ព័ន្ធទាំងនេះ តើនរណាជួយ»?
សម្តេចតេជោនាយករដ្ឋមន្ត្រី បានថ្លែងរំលឹក និងដាស់តឿនប្រជាពលរដ្ឋថា សុខសន្តិភាព គឺជាកត្តាធំបំផុតសម្រាប់កម្ពុជា។ សម្តេចតេជោ ហ៊ុន សែន បានថ្លែងអំណរគុណដល់ប្រជាពលរដ្ឋខ្មែរទាំងអស់ ដែលបានចូលរួមការពារសុខសន្តិភាពរបស់កម្ពុជា។
សម្តេចតេជោ បានថ្លែងចំអកទៅក្រុមមនុស្សដែលលើកឡើងថា កម្ពុជាអត់មានសន្តិភាពផ្លូវចិត្តថា បើធ្វើខុសច្បាប់ គឺត្រូវតែរស់នៅភ័យខ្លាចហើយ។ សម្តេចបន្តថា បើធ្វើខុសច្បាប់ គឺច្បាប់ត្រូវតែមានវិធានការច្បាប់ហើយ។ បើចង់មានសន្តិភាពផ្លូវចិត្ត កុំធ្វើខុសច្បាប់ទៅបានហើយ។
សម្តេចតេជោ ហ៊ុន សែន បានថ្លែងថា សម្តេចបានប្រឹងប្រែងរកសុខសន្តិភាព ក្នុងការបញ្ចប់ជម្លោះប្រដាប់អាវុធពីច្រើនភាគី មកជារាជរដ្ឋាភិបាលតែមួយ និងការគ្រប់គ្រងកម្លាំងតែមួយទៀតផង៕
