(ភ្នំពេញ)៖ សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ នៅព្រឹកថ្ងៃទី០២ ខែកុម្ភៈ ឆ្នាំ២០១៦នេះ បានអញ្ជើញចូលរួមបិទសន្និបាត បូកសរុបលទ្ធផលការងារត្រួតពិនិត្យគ្រឿងប្រចាំឆ្នាំ របស់អាជ្ញាធរជាតិប្រយុទ្ធប្រឆាំងគ្រឿងញៀន ដែលធ្វើឡើងនៅក្រសួងមហាផ្ទៃ។

សន្និបាតនេះ ត្រូវបានធ្វើឡើងរយៈពេល២ថ្ងៃ នៅថ្ងៃទី១-២ ខែកុម្ភៈ ឆ្នាំ២០១៦ ដោយមានការចូលរួម ពីសមត្ថកិច្ចពាក់ព័ន្ធនានា ដែលបានចូលរួមអនុវត្តការបង្រ្កាបគ្រឿងញៀន។

កាលពីម្សិលមិញ ក្នុងពិធីបើកសន្និបាតនេះ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ដែលជាប្រធានអាជ្ញាធរជាតិប្រយុទ្ធប្រឆាំង គ្រឿងញៀនបានថ្លែងថា ឆ្នាំ២០១៥ ថ្នាក់ក្រោមជាតិ អង្គភាពពាក់ព័ន្ធបានបង្រ្កាបបទល្មើស៣០៦១ករណី ឃាត់ខ្លួនជនល្មើស៧០០៨ (ស្រី៨៥៣នាក់) ព្រមទាំងចាប់វត្ថុតាងជាច្រើនទៀត ហើយថានៅឆ្នាំ២០១៦នេះ កម្លាំងសមត្ថកិច្ចពាក់ព័ន្ធ នឹងបន្តប្រតិបត្តិការនេះកាន់តែខ្លាំងឡើង លើការបង្ក្រាបមុខសញ្ញាគ្រឿងញៀន ដែលជាមេរោគបំផ្លាញសង្គមយ៉ាងធ្ងន់ធ្ងរ។

នាយឧត្តមសេនីយ៍​ កែ​ គឹមយ៉ាន​ ឧបនាយករដ្ឋមន្ត្រី​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន​ បានថ្លែងថា​ អង្គសន្និបាតទាំងមូលប្តេជ្ញាចិត្ត រួមគ្នាជាពហុវិស័យដើម្បីដោះស្រាយ នូវបញ្ហាប្រឈមនានា​តាមយុទ្ធសាស្រ្ត របស់អាជ្ញាធរជាតិប្រយុទ្ធប្រឆាំងគ្រឿងញៀន​។

ក្នុងឱកាសនោះសម្តេចក្រឡាហោម​ ស​ ខេង​ បានថ្លែងអបអរសាទរចំពោះការខិតខំ របស់ក្រសួងស្ថាប័ន​អង្គភាព​ និងមន្រ្តី​អនុវត្តន័ច្បាប់ពាក់ពន្ធ័ ដែលបានខិតខំបង្ការ​ បង្រ្កាប​ និងដោះស្រាយបញ្ហាគ្រឿងញៀនរហូត ទទួលបានលទ្ធផលនាពេលនេះ​ ហើយសម្តេចបានស្នើអោយគ្រប់ក្រសួង​ ស្ថាប័ន​ និងអង្គភាពពាក់ព័ន្ធទាំងអស់ បន្តខិតខំយកចិត្តទុកដាក់បន្ថែមទៀត ដើម្បីដោះស្រាយបញ្ហាគ្រឿងញៀន៕