(បាត់ដំបង)៖ ព្រះរាជអាជ្ញាខេត្តបាត់ដំបង លោក នួន សាន បានបញ្ជាក់ប្រាប់ អង្គភាព Fresh News នៅមុននេះបន្តិចនាព្រឹកថ្ងៃទី០២ ខែកុម្ភៈនេះថា មន្រ្តីគយដែលបង្កគ្រោះថ្នាក់ចរាចរណ៌ ត្រូវបានចាប់ខ្លួននៅល្ងាចមិញ ហើយនៅពេលនេះ ស្ថិតក្រោមការសាកសួរ នៅអធិការដ្ឋាននគរបាល ស្រុកកំរៀង ដើម្បីចាត់ការតាមនីតិវិធីច្បាប់។

សូមជំរាបថា រូបភាពវិដេអូដែលមានរយៈពេលជាង១នាទី បានបង្ហាញពីភាពដ៏សាហាវ ដោយបើករថយន្ត Lexus 470 ពណ៌ទឹកស្ករ បុករះនៅទីប្រជុំជនផ្សារកំរៀង ខេត្តបាត់ដំបង នាល្ងាចថ្ងៃទី៣១ ខែមករា ឆ្នាំ២០១៦នេះ។

សមត្ថកិច្ចបានឲ្យដឹងថា ទង្វើ និងសកម្មភាពបើកបុករះនេះ កើតឡើងនៅស្រុកកំរៀង, ខេត្តបាត់ដំបង ដោយរថយន្តពាក់ស្លាកលេខ៖ ភ្នំពេញ 2A-1771 បើកបរដោយឈ្មោះ សៀក ចាន់ ភេទប្រុស អាយុ៤៥ឆ្នាំ ជាមន្ត្រីគយ ប្រចាំច្រកទ្វាតំបន់គីឡូ១៣ (ហៅភ្នំដី) ស្ថិតក្នុងស្រុកសំពៅលូន ខេត្តបាត់ដំបង បានបើករថយន្តក្នុងស្ថានភាពស្រវឹង ចេញពីផ្សារតាវ៉ាន់ នៅចំណុចខាងលើហើយក៏ជ្រុលទៅបុករបងកាស៊ីណូមួយកន្លែង បណ្តាលឲ្យបាក់របងប្រវែង ២ម៉ែត្រ ហើយបានថយក្រោយមកវិញ ក្នុងល្បឿនលឿនក៏បានបុករះទៅលើម៉ូតូ៣គ្រឿង និងរថយន្ត២គ្រឿងទៀត។

បន្ទាប់មករថយន្តនោះក៏បានបើកទៅមុខវិញ ក៏បានបុករបងកាស៊ីណូបណ្តាលឲ្យធ្លាយបាក់មួយកន្លែងទៀត អស់ប្រវែង២ម៉ែត្រ ក៏ជាប់គាំងជាមួយរថយន្តដែលចតចោលនៅក្បែរទីនោះ។ ភ្លាមៗនោះអ្នកបើកបរថយន្ត បង្កគ្រោះថ្នាក់ចរាចរខាងលើក៏បានបើកទ្វារ រត់គេចខ្លួនបាត់ស្រមោលទាំងយប់។