(បាងកក)៖ រដ្ឋាភិបាលយោធាថៃ បាននិងកំពុងតែបញ្ចុះបញ្ចូល​ Facebook និង LINE ឲ្យសហការជាមួយអាជ្ញាថៃ​ក្នុងការលុបចោល​នូវ​មាតិកា​មួយ​ចំនួន ដែលនាំឲ្យប៉ះពាល់ដល់ព្រះរាជវង្ស និង​ប្រទេសជាតិ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃចន្ទ ទី០១ ខែកុម្ភៈ ឆ្នាំ២០១៦។

លោកឧត្តមសេនីយ៍ Pisit Paoin បានថ្លែងប្រាប់សារព័ត៌មាន Reuters ថា រដ្ឋាភិបាលថៃ ក្រោងនឹងជួបជាមួយ​ថ្នាក់ដឹកនាំជាន់ខ្ពស់​ក្រុមហ៊ុន Facebook និង LINE ដើម្បីពិភាក្សាទៅលើការកំណត់ច្បាប់ និង​លក្ខណៈ​មួយចំនួនក្នុងការប្រើប្រាស់ Facebook និង LINE នៅក្នុង​ប្រទេស​ថៃ ជាពិសេសគឺ​តុលាកាថៃតម្រូវឲ្យ Facebook និង LINE ជួយទប់ស្កាត់រាល់មាតិកាមួយចំនួន ដែលនាំឲ្យប៉ះពាល់ ដល់ប្រទេសជាតិ និងរបបរាជានិយម ជាពិសេសគឺបញ្ហាសុវត្ថិភាព និងសន្ដិភាព។

លោកឧត្តមសេនីយ៍ ក៏បានបញ្ជាក់បន្ថែមទៀតថា រដ្ឋាភិបាលថៃក៏បានស្នើទៅកាន់ក្រុមហ៊ុន Google និង YouTube កាលពីថ្ងៃទី២២ ខែមករា​រួចហើយ​ដែរ ទៅលើបញ្ហាដូចគ្នានេះ៕