(ទីក្រុងបាដាដ)៖ រដ្ឋាភិបាលអ៉ីរ៉ាក់ បានអំពាវនាវរកជំនួយជាងទឹកប្រាក់ប្រមាណ ១,៥៦ពាន់លានដុល្លារអាមេរិក នៅក្នុងឆ្នាំ២០១៦នេះ ដើម្បីកាត់បន្ថយវិបត្តិមនុស្សជាតិ ដោយសារតែប្រទេសមួយនេះ បានជួបនឹងសង្គ្រាម​ប្រឆាំងក្រុមឧទ្ទាម ISIS នេះបើយោងតាមការ ចេញផ្សាយរបស់ទីភ្នាក់ងារព័ត៌មានចិនស៊ិនហួ នៅថ្ងៃទី០១ ខែកុម្ភៈ ឆ្នាំ២០១៦។

រដ្ឋាភិបាលនៃទីក្រុងបាដាដ បានបញ្ជាក់ថា​ ការអំពាវនាវរកជំនួយនេះដោយសារតែ​ប្រទេស របស់ខ្លួនបានជួបនូវបញ្ហាប្រាក់ចំណូល បានមកពីការលក់ប្រេងធ្លាក់ចុះ ដូច្នេះហើយទើបអំពាវនាវឲ្យ​សហគមន៍អន្តរជាតិជួយ។

យោងតាមរបាយការណ៍របស់អង្គការអន្តរជាតិទេសន្តរប្រវេសន៍ (IOM) បានឲ្យដឹងថា ក្នុងមនុស្សប្រមាណ ៣.៣លាននាក់កំពុងគ្មាន ជំរកស្នាក់នៅ, ជនស៊ីវិល ១៨,៨០០នាក់ ត្រូវបានសម្លាប់ និង៣៦,២៤០នាក់ បានរងរបួស នៅក្នុងឆ្នាំ២០១៥ ដោយសារតែសង្គ្រាម ប្រឆាំងក្រុម ISIS។

គួរបញ្ជាក់ផងដែរថា កាលពីឆ្នាំ២០១៥ រដ្ឋាភិបាលអ៉ីរ៉ាក់ បានចំណាយថវិកា ៨៥០លានដុល្លារ​អាមេរិក សម្រាប់ការខិតខំប្រឹងប្រែង លើវិស័យមនុស្សធម៌៕