(ភ្នំពេញ)៖ បុរសសន្តិសុខឯកជន ដែលយាមកាមនៅសណ្ឋាគារ២៨៨ (Hotel & Serviced Apartment) ស្ថិតនៅតាមផ្លូវលេខ២៨៨ សង្កាត់បឹងកេងកងទី២ ខណ្ឌចំការមន បានបង្កគ្រោះថ្នាក់ចរាចរណ៍ គួរឲ្យរន្ធត់មួយ ដោយបើករថយន្ត របស់សណ្ឋាគារម៉ាក Camry Hybrid ទៅបុកចូលផ្ទះប្រជាពលរដ្ឋនៅក្បែរនោះ បណ្តាលឲ្យស្លាប់កូនម្ចាស់ផ្ទះម្នាក់យ៉ាងអាណោចអាធ័មនៅព្រឹកព្រលឹមថ្ងៃទី១ ខែកុម្ភៈ ឆ្នាំ២០១៦នេះ។

ភ្នាក់ងារ Fresh News បានរាយការណ៍ថា មុនពេលកើតហេតុ ជនបង្កជាសន្តិសុខនោះ បានបើករថយន្ត របស់សណ្ឋាគារ ស្រាប់តែរថយន្តជាប់ហ្រ្វាំង ក៏ជ្រុលចង្កូតទៅបុកចូលផ្ទះ និងប៉ើងទ្វារ ដែលចាក់សោរ រួចក៏ទៅបុកកូនក្មេងតូច បណ្តាលឲ្យរងរបួសធ្ងន់ តែបានស្លាប់ពេលបញ្ជូនទៅកាន់មន្ទីរពេទ្យគន្ធបុប្ផា។

ក្រោយកើតហេតុ កម្លាំងសមត្ថកិច្ច បានចុះទៅជួយអន្តរាគមន៍ និងឃាត់ខ្លួន បុរសជាសន្តិសុខ យកទៅសួរនាំ និងចាត់វិធានការណ៍តាមផ្លូវច្បាប់៕