(ភ្នំពេញ)៖ កម្លាំងអាវុធហត្ថ ខណ្ឌពោធិ៍សែនជ័យ នៅរសៀលថ្ងៃទី៣១ ខែមករា ឆ្នាំ២០១៦នេះ បានស្រាវជ្រាវរហូតតាមចាប់ ជនសង្ស័យម្នាក់ជាបុគ្គលិកក្រុមហ៊ុន CSC ដែលបានទៅលួចកាត់ខ្សែរកាប្តិ៍ដោយអះអាងថា ខ្លួនជាបុគ្គលិកក្រុមហ៊ុនទូរស័ព្ទ MOBITEL ស្ថិតនៅចំណុចភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

មេបញ្ជាការអាវុធហត្ថ ខណ្ឌពោធិ៍សែនជ័យ​ លោក ជឹម ឬទ្ធី បានបញ្ជាក់ថា ជនសង្ស័យ ឈ្មោះ អ៊ុន ឆ័ន អាយុ៣០ឆ្នាំ មុខរបរបុគ្គលិកក្រុមហ៊ុន CSC ស្នាក់នៅ បន្ទប់ជួល សង្កាត់ស្ទឹងមានជ័យ ខណ្ឌមានជ័យ។ ក្រោយចាប់ខ្លួន កម្លាំងអាវុធហត្ថ បានដកហូតខ្សែ កាប្តិ៍ចំនួន៣ដុំ ប្រវែងប្រហែល២០M កន្ត្រៃយ៍សម្រាប់កាត់ខ្សែរភ្លើង២ ទួណឺវិស៣ សោរលេខ១៣ចំនួន១ និងម៉ាលែតតូចចំនួន១។

បច្ចុប្បន្នជនសង្ស័យស្ថិត ក្រោមការ សាកសួរពីមន្រ្តីអាវុធហត្ថខណ្ឌពោធិ៍សែនជ័យនិងមន្រ្តីអាវុធហត្ថការិយាល័យ​ ព្រហ្មទណ្ឌ រាជធានីភ្នំពេញ៕