(កំពង់ចាម)៖ សាលាបុណ្យទំហំទទឹង៩ម៉ែត្រ បណ្តោយ១៥ម៉ែត្រ ដែលចំណាយទឹកប្រាក់តម្លៃ៣៨,៥០០ដុល្លារ នៅក្នុងវត្តសំវរសីល ត្រូវបានធ្វើបុណ្យឆ្លង ដាក់ឲ្យប្រើប្រាស់ក្នុងវិស័យពុទ្ធសាសនា នៅព្រឹកថ្ងៃទី១៧ ខែកញ្ញា ឆ្នាំ២០២០។ ពិធីបុណ្យឆ្លងសាលាបុណ្យនេះ ធ្វើឡើងក្រោមវត្តមាន លោក ឡៃ ឡេក និងលោកស្រី សាន ឆេងហាង ព្រមទាំងក្រុមគ្រួសារ ដែលឧបត្ថម្ភការកសាង នៅភូមិកំប៉ាល់ ឃុំសណ្តែក ស្រុកបាធាយ ខេត្តកំពង់ចាម។
ជាមួយគ្នា លោកក៏បានឧបត្ថម្ភប្រេងម៉ាស៊ូត៥កាន ជូនដល់រដ្ឋបាលឃុំសណ្តែក ទុកសម្រាប់ចែកជូនភូមិចំនួន៥ភូមិ ដើម្បីសម្រាប់ប្រើប្រាស់បូមទឹកតាមភូមិនីមួយៗផងដែរ។
លោក ឡៃ ឡេក បានលើកឡើងថា អ្វីៗដែលកើតមានថ្ងៃនេះ ដោយសារប្រទេសកម្ពុជា មានសុខសន្តិភាពពេញបរិបូរណ៍ ទើបមានការអភិវឌ្ឍរីកចម្រើនលើគ្រប់វិស័យ ទាំងពុទ្ធចក្រ និងអាណាចក្រ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ទើបស្រុកទេសសំបូរសប្បាយ មានការអភិវឌ្ឍទៅមុខជាលំដាប់។
លោកបន្តទៀតថា ការកសាងសាលាបុណ្យនេះ ដោយមើលឃើញការលំបាក់ដល់ប្រជាពលរដ្ឋ មកធ្វើបុណ្យទាន គ្មានកន្លែងអង្គុយ ខ្លះអង្គុយក្រោមដើមឈើ ទើបលោក និងភរិយា សម្រេចចិត្តកសាងសាលាបុណ្យជូនដល់ព្រះសង្ឃ និងលោកតា លោកយាយ និងប្រជាពលរដ្ឋ ហើយទីនេះ គឺជាទឹកដីស្រុកកំណើតរបស់លោក និងភរិយាផងដែរ។
ក្នុងឱកាសនោះដែរ ប្រជាពលរដ្ឋទូទាំង៥ភូមិ នៅឃុំសណ្តែក បានត្រេកអរយ៉ាងខ្លាំងនៅពេលដែលលោក ឡៃ ឡេក និងគ្រួសារ បានចំណាយថវិកាផ្ទាល់ខ្លួន ជួយកសាងសាលាបុណ្យ ដែលនេះជាទឹកចិត្តសប្បុរសកម្ររកបាន ជួយដល់នៅវត្តសំវរសីល ដែលស្ថិតនៅស្រុកបាធាយ។
ជាមួយគ្នានេះ លោក ហ៊ល ញ៉ុង មេឃុំសណ្តែក តាងនាមឲ្យរដ្ឋបាលឃុំសណ្តែកទាំងអស់គ្នា មានកិត្តិយសរួមជាមួយព្រះតេជគុណគ្រប់ព្រះអង្គ និងប្រជាពលរដ្ឋទាំងអស់នៅឃុំសណ្តែក មានក្តីរីករាយ ដោយលោក ឡៃ ឡេក និងលោកស្រី សាន ឆេងហាង ដែលគាត់បានឃើញការលំបាករបស់ប្រជាពលរដ្ឋ ព្រះសង្ឃគ្រប់ព្រះអង្គ ក្នុងវត្តសំវរសីល បានផ្តល់នូវសាលាបុណ្យមួយខ្នងដែលក្នុងឃុំរបស់លោក។
ក្នុងឱកាសនោះ លោក ឡៃ ឡេក និងភរិយា បានឧបត្ថម្ភដល់កម្លាំងប្រជាការពារចំនួន៥នាក់ ក្នុងម្នាក់ ចំនួន៥ម៉ឺនរៀល ក្នុងកិច្ចការពារសន្តិសុខ សណ្តាប់ធ្នាប់ ចំនួន១៥ថ្ងៃរយៈពេលដាក់បិណ្ឌ និងបុណ្យភ្ជុំបិណ្ឌ និងបានចែកថវិកា មួយចំនួនដល់លោកតាលោកយាយផងដែរ៕
