(ភ្នំពេញ)៖ នាយឧត្តមសេនីយ៍ សាស្ត្រាចារ្យ បណ្ឌិត សេង ផល្លី ប្រធានបណ្ឌិត្យសភានគរបាលកម្ពុជា នាព្រឹកថ្ងៃទី០៨ ខែកញ្ញា ឆ្នាំ២០២០នេះ បានអញ្ជើញជាអធិបតី ក្នុងពិធីបើកសិក្ខាសាលាផ្សព្វផ្សាយលទ្ធផល នៃការសិក្សាស្រាវជ្រាលើប្រធានបទ «ប្រសិទ្ធភាពនៃការអនុវត្តច្បាប់ចរាចរណ៍ផ្លូវគោក ក្នុងរាជធានីភ្នំពេញ»។

សិក្ខាសាលានេះ ធ្វើឡើងនៅសាកលវិទ្យាល័យធនធានមនុស្ស រាជធានីភ្នំពេញ ដោយមានការអញ្ជើញចូលរួម ពីតំណាងអង្គភាព និងស្ថាប័ន រដ្ឋចំនួន១៤ អង្គការក្រៅរដ្ឋាភិបាលចំនួន១ សមាគមដឹកជញ្ជូនអ្នកដំណើរ និងក្រុមហ៊ុន ហ៊ុនដា ព្រមទាំងអ្នកចូលរួម សរុបចំនួនប្រមាណ១០០នាក់។

ឧត្តមសេនីយ៍ទោ សាស្ត្រាចារ្យរង សេន សត្យា នាយកវិទ្យាស្ថានស្រាវជ្រាវវិទ្យាសាស្ត្រនគរបាល នៃបណ្ឌិត្យសភានគរបាលកម្ពុជា បានលើកឡើងថា វិទ្យាស្ថាន បានធ្វើការសិក្សាស្រាវជ្រាវលើប្រធានបទនេះ ក្នុងរយៈពេល៥ខែ ចាប់ផ្តើមពីចុងខែតុលា ឆ្នាំ២០១៩ ដល់ខែមីនា ឆ្នាំ២០២០ និងបានបញ្ចប់ការសរសេររបាយការណ៍ លទ្ធផលនៃការស្រាវជ្រាវជាស្ថាពរ ដែលត្រូវការផ្សព្វផ្សាយក្នុងអង្គសិក្ខាសាលានាពេលនេះ។

ក្នុងឱកាសនោះ នាយឧត្តមសេនីយ៍ សាស្ត្រាចារ្យ បណ្ឌិត សេង ផល្លី បានសំដែងនូវការគាំទ្រ និងវាយតម្លៃខ្ពស់លើលទ្ធផលនៃការសិក្សា ស្រាវជ្រាវនេះ និងបញ្ជាក់ថា គម្រោងសិក្សាស្រាវជ្រាវនេះ មានការឧបត្ថម្ភគាំទ្រថវិកាពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលផ្តល់ឲ្យបណ្ឌិត្យសភា ធ្វើការសិក្សាស្រាវជ្រាវតាមលក្ខណៈ វិទ្យាសាស្ត្រ ដើម្បីរកឲ្យឃើញនូវបញ្ហាប្រឈម កត្តារាំងស្ទះនានា និងដាក់ចេញនូវវិធានដោះស្រាយ ឲ្យទាន់ពេលវេលា ប្រកបដោយប្រសិទ្ធភាពខ្ពស់។

នាយឧត្តមសេនីយ៍ សេង ផល្លី បានបញ្ជាក់បន្ថែមថា លទ្ធផលនៃការសិក្សាស្រាវជ្រាវ បានរកឃើញថា ការយល់ដឹងរបស់ប្រជាពលរដ្ឋ អំពីសុវត្ថិភាពចរាចរណ៍ផ្លូវគោក នៅមិនទាន់បានទូលំទូលាយ ហើយអ្នកបើកបរភាគច្រើននៅមិនទាន់មាន ឥរិយាបថចូលរួមក្នុងការគោរពច្បាប់ និងការរឹតបណ្ដឹងការអនុវត្តច្បាប់ចរាចរណ៍ផ្លូវគោក ឲ្យមានប្រសិទ្ធភាពនៅមាន កម្រិតទាបនៅឡើយ។

នាយឧត្តមសេនីយ៍បន្ដទៀតថា ចំណែកការចូលរួមសហការរបស់អ្នកពាក់ព័ន្ធ ក៏នៅមានភាពខ្វះចន្លោះ ក្នុងការចូលរួមពង្រឹង ការអនុវត្តច្បាប់ផងដែរ ហើយ ធនធានគាំទ្រដល់ដំណើរការអនុវត្ត ការងារគ្រប់គ្រងសុវត្ថិភាពចរាចរណ៍ផ្លូវគោក នៅមានការខ្វះខាតច្រើន ដែលជាហេតុផលធ្វើឲ្យប្រសិទ្ធភាព នៃការអនុវត្តច្បាប់ចរាចរណ៍ផ្លូវគោកក្នុងរាជធានីភ្នំពេញ នៅមានកម្រិត។

ជាមួយគ្នានោះ នាយឧត្តមសេនីយ៍ សាស្ត្រាចារ្យ បណ្ឌិត សេង ផល្លី បានបន្ថែមថា សិក្ខាសាលានេះ មានគោលបំណង និងសារៈសំខាន់ ដូចខាងក្រោម៖

* ផ្សព្វផ្សាយលទ្ធផលនៃការសិក្សាស្រាវជ្រាវលើប្រធានបទ «ប្រសិទ្ធភាពនៃការអនុវត្តច្បាប់ចរាចរណ៍ផ្លូវគោក ក្នុងរាជធានីភ្នំពេញ» ដល់អ្នកពាក់ព័ន្ធ

* ប្រមូលយោបល់ និងធាតុចូលបន្ថែមទៀត ពីអ្នកពាក់ព័ន្ធលើយុទ្ធសាស្ត្រអន្តរាគមន៍ តាមអនុសាសន៍ដែល បានស្នើឡើងនៅក្នុងរបាយការណ៍លទ្ធផលស្រាវជ្រាវ

* ពង្រឹងទំនាក់ទំនងនិងកិច្ចសហការគ្នា លើការងារស្រាវជ្រាវរវាងវិទ្យាស្ថានស្រាវជ្រាវវិទ្យាសាស្ត្រនគរបាល នៃបណ្ឌិត្យសភានគរបាលកម្ពុជា ជាមួយអ្នកពាក់ព័ន្ធ និងដៃគូអភិវឌ្ឍ និង

* លទ្ធផលនៃការស្រាវជ្រាវ នឹងបម្រើជាប្រយោជន៍ ដល់អ្នកពាក់ព័ន្ធសម្រាប់ការងារគ្រប់គ្រងសុវត្ថិភាព ចរាចរណ៍ផ្លូវគោកនៅក្នុងរាជធានីភ្នំពេញ ឲ្យមានលក្ខណៈប្រសើរឡើង៕