(កណ្តាល)៖ សេចក្តីរាយការណ៍សមត្ថកិច្ចខេត្តកណ្តាល បានឲ្យដឹងថា មានគ្រោះថ្នាក់ចរាចរណ៍មួយ បានកើតឡើងនៅម៉ោង៥៖១០នាទី ព្រឹកព្រលឹមថ្ងៃទី២៩ ខែមករា ឆ្នាំ២០១៦នេះ នៅចំនុចកំណាត់ផ្លូវជាតិលេខ៤ ចន្លោៈគីឡូម៉ែត្រលេខ៣០-៣១ មុខភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល ដោយរថយន្តដឹកទំនិញធុនធំចំនួន២គ្រឿងបុកគ្នាយ៉ាងពេញទំហឹង បណ្តាលឲ្យស្លាប់អ្នកបើកបរម្នាក់ ខណៈម្នាក់ទៀតរត់គេចយករួចខ្លួនបាត់។

សមត្ថកិច្ចបានឲ្យដឹងទៀតថា រថយន្តបង្ករដោយរថយន្ត១គ្រឿងម៉ាក់ FUZU (ប្រភេទសណ្ដោងរ៉ឺម៉ក) ពណ៌ខ្លាញ់ក្ដាមពាក់ផ្លាកលេខ ភ្នំពេញ 3C-2236 អ្នកបើកបរ មិនស្គាល់ឈ្មោៈ (រត់គេចខ្លួនបាត់) បានបើកពីទិសខាងកើតទៅលិច (ភ្នំពេញទៅកំពង់សោម) បានជ្រុលចង្កូតទៅបុករថយន្ត១គ្រឿងទៀត ម៉ាក HINO ពណ៌ក្រហម ពាក់ផ្លាកលេខភ្នំពេញ 3A-0093 បើកបរដោយឈ្មោៈ គង់ ធុល ភេទ ប្រុស រស់នៅភូមិ ស្រែរនោង ឃុំស្រែរនោង ស្រុកត្រាំកក់ ខេត្តតាកែវ បណ្តាលឲ្យស្លាប់ជាប់ក្នុងកាប៊ីនរថយន្ត ដែលបើក ពីទិសខាងលិចទៅកើត (កំពង់សោម ទៅភ្នំពេញ) ហើយរថយន្តទាំង២ ធ្លាក់ចូលក្នុងប្រឡាយទឹក ខាងត្បូងផ្លូវជាតិ បង្កឲ្យមានការកកស្ទះចរាចរណ៍ផងដែរ។

សមត្ថកិច្ចបញ្ជាក់ទៀតថារថយន្តទាំង០២គ្រឿង កំលាំងជំនាញបានធ្វើការវាស់វែង និងយកមករក្សាទុកនៅអធិការដ្ឋាននគរបាល ស្រុកអង្គស្នួល ដើម្បីកសាងសំនុំរឿង តាមនិតិវិធីច្បាប់៕