(ភ្នំពេញ)៖ បុរសម្នាក់ដែលជាមេកានៅភោជនីយដ្ឋានផែថ្ម បានរងរបួសធ្ងន់ ដោយសារតែ អ្នកបើករថយន្តឲ្យថៅកែភោជនីយដ្ឋានផែថ្ម រាលកៃកាំភ្លើងចំកំភួនជើងខាងឆ្វេង។ ហេតុការណ៍នេះ បានកើតឡើង នៅវេលាម៉ោង ១៤៖១៥នាទី​ ថ្ងៃទី​២៨ ខែមករា ឆ្នាំ២០១៦ ត្រង់ចំណុចភោជនីយដ្ឋានផែថ្ម ផ្លូវ៨២ កែង៣៩ ភូមិ៤ សង្កាត់ស្រះចក​ ដូនពេញ។

ជនរងគ្រោះឈ្មោះ ឈួង សុខហៀង ភេទប្រុស អាយុ២៨ឆ្នាំ មុខរបរ​មេការភោជនីយដ្ឋានផែថ្ម ស្នាក់នៅហាងផែថ្ម រងរបួស ០១គ្រាប់ចំកំភួនជើងខាងឆ្វេង។ ជនបង្កឈ្មោះ ហោ ត្រាយ ភេទប្រុស អាយុ៣៧ឆ្នាំ មុខរបរអង្គរក្ស និងជាអ្នកបើករថយន្តអោយ ឈ្មោះ ចេង ហុង ជាថៅកែភោជនីយដ្ឋានផែថ្ម។

យោងតាមសមត្ថកិច្ច បានឲ្យដឹងថា នៅវេលាម៉ោងខាងលើ ជនបង្ករឈ្មោះ ហោ ត្រាយ បានដឹកថៅកែរបស់ខ្លួនឈ្មោះ ចេង ហុង មកមើលបុគ្គលិកហាងឈ្លោះគ្នា ហើយជនបង្កបានចុះពីឡាន ដកអាវុធខ្លីម៉ាក GLOCK មកកាន់នឹងដៃអាម៉េដោះគ្រាប់​ ភ្លាមនោះមិនដឹងយ៉ាងម៉េច​ក៏ឮសូរស្នូរផ្ទុះអាវុធចំនួន០១គ្រាប់ បណ្តាលឲ្យត្រូវ​ជនរងគ្រោះឈ្មោះ ឈួន សុខហៀង តែម្តង។

ក្រោយកើតហេតុជនសង្ស័យបានគេចខ្លួនពីហាងផែថ្មបាត់ស្រមោល ចំនែកជនរងគ្រោះ បច្ចុប្បន្នកំពុងសង្រ្គោះនៅមន្ទីរពេទ្យកាល់ម៉ែត៕