(ស្ទឹងត្រែង)៖ ថៅកែរោងសិប្បកម្មផលិតទឹកកក ប្រចាំខេត្តស្ទឹងត្រែងដ៏មានឥទ្ធិពល ត្រូវបានព្រះរាជអាជ្ញាអមសាលាដំបូងខេត្ត លោក ជា ពេជ្យ បញ្ជាឲ្យដោះលែងត្រឡប់ទៅវិញ បើទោះបីជននេះត្រូវបានកម្លាំងសមត្ថកិច្ចចាប់ខ្លួនពាក់ព័ន្ធ ការបង្កគ្រោះថ្នាក់ចរាចរណ៌បើករថយន្តស៊េរីទំនើប ម៉ាក TUNDRA ទៅបុកជនរងគ្រោះ២នាក់ ប្តីប្រពន្ធ ដែលបណ្តាលឲ្យប្តីជាមេភូមិផងនោះស្លាប់ ខណ:ប្រពន្ធរងរបួសធ្ងន់ នៅយប់ថ្ងៃទី២៤ ខែមករា ឆ្នាំ២០១៦កន្លងទៅ។

នាយការិយាល័យចរាចរណ៌ផ្លូវគោក នៃស្នងការដ្ឋាននគរបាលខេត្តស្ទឹងត្រែង លោក គង់ រតនា បានប្រាប់អង្គភាព Fresh News នៅយប់ថ្ងៃទី២៦ ខែមករា ឆ្នាំ២០១៦នេះថា ថៅទឹកកកនោះ ត្រូវបានលោកព្រះរាជអាជ្ញា បញ្ជាឲ្យទៅវិញ ដោយមានអ្នកធនា។

នាយការិយាល័យចរាចរណ៌រូបនេះ បានបញ្ជាក់ថា មូលហេតុដែលនាំឲ្យលោកព្រះរាជអាជ្ញាដោះលែងនោះ ក៏ព្រោះតែថៅកែលក់ទឹកកកបានអះអាងថា ខ្លួនមិនបានបើករថយន្តទេ គឺមិត្តភក្តិរបស់ខ្លួន ខ្ចីទៅបើក។

ជុំវិញការសម្រេចដោះលែងថៅកែ លក់ទឹកកកខាងលើនេះ អង្គភាព Fresh News មិនទាន់អាចសុំការបកស្រាយ ពីលោកព្រះរាជអាជ្ញាបាននៅឡើយទេ នៅយប់ថ្ងៃដដែលនេះ។

ជុំវិញការសម្រេចរបស់ លោកព្រះរាជអាជ្ញាខាងលើនេះប្រជាពលរដ្ឋ និងមជ្ឈដ្ឋានជាច្រើនបានចាត់ទុកថា សម្រាប់អ្នកមានលុយ និងមានឥទ្ធិពលគឺមិនត្រូវបានយកទោសយកពៃនោះឡើយ នៅពេលដែលបង្កគ្រោះថ្នាក់ចរាចរណ៌ ឬបង្កបទល្មើសអ្វីមួយ តែសម្រាប់អ្នកក្រ និងអ្នកទន់ខ្សោយវិញ នឹងត្រូវចាប់ខ្លួនភ្លាមៗ ហើយកាត់ទោសដាក់ពន្ធនាគារយ៉ាងតឹងរឹងបំផុត។

ចំពោះជនបង្ករូបនេះបានអះអាងថា ខ្លួនមិនមែនជាអ្នកបើករថយន្តនោះ ត្រូវបានប្រជាពលរដ្ឋឆ្លើយថា គឺជាលេសដោះសារដើម្បីដកបន្ទុក ពីព្រោះថៅកែទឹកកករូបនេះ ពិតជាបើករថយន្តទាំងស្រវឹងពេលចេញពីខារ៉ាអូខេយ៉ាងប្រាកដ ។ ខណ:ដែលជនរងគ្រោះមិនទាន់ទទួលយុត្តិធម៌ និងសំណងផងនោះ ស្រាប់តែជនបង្កត្រូវបានរួចខ្លួនទៀត វាផ្ទុយទៅនឹងការពង្រឹងច្បាប់ចរាចរណ៌ផ្លូវគោករបស់រាជរដ្ឋាភិបាល។

អ្នកច្បាប់មួយរូបបានថ្លែងថា យោងតាមមាត្រា៨៧ នៃច្បាប់ចរាចរណ៌ផ្លូវគោក ជនដែលបង្កគ្រោះថ្នាក់ចរាចរណ៌បណ្តាលឲ្យអ្នកដទៃស្លាប់ និងរងរបួសយ៉ាងដូច្នេះ ត្រូវប្រឈមមុខនឹងការជាប់ពន្ធនាគារ ពី៣ទៅ៥ឆ្នាំ ហើយត្រូវផ្តល់សំណងពី២០លានរៀល ទៅ៥០លានរៀល។

សូមបញ្ជាក់ថា បុរស​ជា​ប្តី​បាន​ស្លាប់​ភ្លាមៗ និង​ប្រពន្ធ​រង​របួស​ធ្ងន់ ត្រូវ​បាន​រថយន្ត​សង្គ្រោះ​បន្ទាន់ ​ដឹក​យក​ទៅកាន់​មន្ទីរ​ពេទ្យ​បង្អែក​ខេត្តស្ទឹងត្រែង ដោយសារ​បុរស​ម្នាក់ ដែលត្រូវគេស្គាល់ថា ជាថៅកែលក់ទឹកកក ប្រចាំខេត្តស្ទឹងត្រែង ​បើក​រថយន្ត​ស៊េរី​ទំនើប​ម៉ាក TUNDRA ចេញពី​ច្រៀង​សប្បាយ ​នៅ​ហាង​ខារ៉ាអូខេ​យីហោ ​«​កាឡាក់ស៊ី​» ក្នុង​ស្ថាន​ភាព​ស្រវឹង បាន​រ៉េ​ចង្កូត​ទៅ​បុក​ម៉ូតូ ​របស់ជនរងគ្រោះទាំង២នាក់ ដែលកំពុងឌុបគ្នា។

​ភ្នាក់ងារ Fresh News ប្រចាំខេត្តស្ទឹងត្រែង បានរាយការណ៌នៅរសៀលថ្ងៃទី២៥ ខែមករា នេះថា ​គ្រោះថ្នាក់​ចរាចរណ៍​នេះ បាន​កើតឡើង​ នៅ​វេលា​ម៉ោង​៩​និង​៣០​នាទី​យប់​ ថ្ងៃទី​២៤ ខែមករា ឆ្នាំ​២០១៦ ត្រង់ចំណុច​ជិត​ខារ៉ាអូខេ «​ឦសាន​មនោ​រម្យ​» ស្ថិតក្នុង​ភូមិ​លើ សង្កាត់​ស្រះ​ឫស្សី ក្រុង​ស្ទឹងត្រែង​។​

​​មន្ត្រីនគរបាល​ចរាច​ណ៍​ខេត្ត​បាន​ឲ្យ​ដឹងថា ករណី​គ្រោះថ្នាក់​ចរាច​ណ៍​បង្កឡើង​ ដោយ​រថយន្ត​ម៉ាក​ធុន​ត្រា ​(TUNDRA) ពណ៌​ស្ករ ពាក់​ស្លាក​លេខ ភ្នំពេញ​2AD-6119 បើកបរ​ដោយ​ឈ្មោះ​ឡោ លី​ផេង ភេទ​ប្រុស អាយុ​៤១​ឆ្នាំ ជា​ម្ចាស់​សិប្បកម្ម​ផលិត​ទឹកកក នៅ​ភូមិ​ស្រែ​ពោធិ៍ សង្កាត់​ស្រះ​ឫស្សី ក្រុង​ស្ទឹងត្រែង​។

ចំណែក​ម៉ូតូ​ម៉ាក​ហុងដា C125 ពណ៌​ខ្មៅ ពាក់​ស្លាក​លេខ​ស្ទឹងត្រែង ​1A-5577 បើ​បរ​ពី​លិច​មក​កើត (​ច្រាសទិស​) បើកបរ​ដោយ​ឈ្មោះ​ ព្រហ្ម សំរិត ភេទ​ប្រុស អាយុ​៥០​ឆ្នាំ បាន​ស្លាប់​នៅ​មន្ទីរពេទ្យ មានមុខរ​បរជា​មេភូមិ និង​ប្រពន្ធ​ឈ្មោះ ​ពុធ កៃ​សន ភេទ​ស្រី អាយុ​៤៨​ឆ្នាំ បាន​រងរបួស​ធ្ងន់ និង​មាន​ទីលំនៅ​ភូមិ​ថ្មី សង្កាត់​សាមគ្គី ក្រុង​-​ខេត្តស្ទឹងត្រែង​។

​សមត្ថកិច្ច​បាន​បន្តទៀត​ថា សាក្សី​នៅ​កន្លែងកើតហេតុ​បាន​និយាយថា មុនពេល​កើតហេតុ ម្ចាស់​រថយន្ត​ស៊េរី​ទំនើប ​បាន​ចេញពី​ច្រៀង​ខារ៉ាអូខេ ក្នុងស្ថានភាព​ស្រវឹង​ជោក បើកបរ​ក្នុង​ល្បឿន​លឿន ខណៈ​ជនរងគ្រោះ​២​នាក់​ប្តី​ប្រពន្ធ កំពុង​ជិះ​ម៉ូតូ​ច្រាសទិស​គ្នា ក៏ត្រូវ​រថយន្ត​រ៉េ​ចង្កូត បុក​ពេញទំហឹង បង្ក​ឲ្យ​បុរស​ជា​ប្តី​ បាន​ស្លាប់​ពេល​បញ្ជូនទៅ​មន្ទីរពេទ្យ​។ រីឯ​ប្រពន្ធ​បាន​រងរបួស​ធ្ងន់​បាក់ឆ្អឹង​ជំនី បាក់ជើង​ឆ្វេង និង​បាក់ដៃ​ឆ្វេង ត្រូវបាន​រថយន្ត​ដឹក​យកទៅ​សង្គ្រោះបន្ទាន់ ​នៅ​មន្ទីរពេទ្យ​២១ យោធភូមិភាគ​ទី​១​។ ភ្លាមនោះ​ម្ចាស់​រថយន្ត​ បាន​បើក​យកទៅ​រក្សាទុក​ នៅក្នុង​រោង​សិប្បកម្ម​ផលិត​ទឹកកក​ បាត់​តែម្ដង​៕

​ក្រោយ​កើតហេតុ​គេ​បានឃើញ នគរបាល​ចរាចរណ៍​ស្នងការដ្ឋាន​នគរបាល​ខេត្ត​ចុះ​ទៅដល់​កន្លែងកើតហេតុ និង​ធ្វើការ​ស្រាវជ្រាវ​សាកសួរ​សាក្សី​ឃើញ​ហេតុការណ៍ ទើប​រក​រថយន្ត​បង្ក​បាន​បើក​រត់គេច​យកទៅ​លាក់ទុក​នៅ​កន្លែង​សិប្បកម្ម​ផលិត​ទឹកកក តែ​ត្រូវបាន​សមត្ថកិច្ច​តាមរក​ឃើញ​នាំយក​រថយន្ត​បង្ក និង​ម៉ូតូ​មកកាន់​ការិយាល័យ​ចរាចរណ៍​ផ្លូវគោក​ ​ដើម្បី​ចាត់វិធានការ​តាមផ្លូវ​ច្បាប់​៕