(ស្វាយរៀង)៖ គ្រឿងឧបភោគបរិភោគនិងថវិកាចំនួន២លានរៀល ត្រូវបានលោក កែវ សារ៉ាត់ ប្រធានកងឯកភាពកម្ចាត់មីនទី៥ តំណាងលោក ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកស៉ីម៉ាក់ និងក្រុមការងារប្រគល់ជូនអ្នកស្រី គង់ សារឿន វីរនារីអង្គភាពដោះមីន ខេត្តស្វាយរៀង ដែលកំពុងមានជំងឺសម្រាកព្យាបាល នៅមន្ទីរពេទ្យបង្អែកស្រុកស្វាយទាប ជាមួយស្វាមី។
ថ្លែងក្នុងឱកាសផ្តល់អំណោយ នាព្រឹកថ្ងៃទី១១ ខែសីហា ឆ្នាំ២០២០ ស្ថិតក្នុងឃុំកណ្ដៀងរាយ ស្រុកស្វាយទាប លោក កែវ សារ៉ាត់ បានផ្ដាំផ្ញើសាកសួរសុខទុក្ខ នឹករលឹកពីសំណាក់លោក ហេង រតនា ដល់អ្នកស្រី គង់ សារឿន។
លោកក៏បានកោតសរសើរ និងថ្លែងអំណរគុណយ៉ាងជ្រាលជ្រៅជូនចំពោះអ្នកស្រី ដែលមានស្នាដៃ និងបានចូលរួមចំណែកយ៉ាងសកម្ម ក្នុងការបោសសម្អាតមីននាពេលកន្លងមក ដោយលោក ហេង រតនា មិនដែលភ្លេចពីវីរភាពរបស់ប្រតិបត្តិករដោះមីនណាម្នាក់ចោលឡើយ ទោះក្នុងកាលៈទេសៈណាក៏ដោយ។
លោកបន្ថែមថា ការចុះមកពេលនេះ មានគ្រឿងឧបភោគបរិភោគ មួយចំនួនសម្ភារប្រើប្រាស់ចាំបាច់ និងថវិកាមួយចំនួន ជូនអ្នកស្រីដើម្បីដោះស្រាយជីវភាពរស់នៅប្រចាំថ្ងៃ បានមួយរយៈពេលផងដែរ។
ក្នុងឪកាសនោះអ្នកស្រី គង់ សារឿន បានលើកដៃប្រណមថ្លែងអំណរគុណដល់លោក ហេង រតនា និងក្រុមការងារដែលបានចុះសួរសុខទុក្ខ និងផ្តល់អំណោយដល់អ្នកស្រី និងក្រុមគ្រួសារដែលកំពុងមានជំងឺសម្រាកព្យបាលនៅមន្ទីរពេទ្យនាពេលនេះ។
សូមបញ្ជាក់ថា អ្នកស្រី គង់ សារឿន មានជំងឺស្ពឹកមួយចំហៀងខ្លួន ចំណែកលោក ភោគ សំអុល អាយុ៧០ឆ្នាំ ដែលជាស្វាមី មានជំងឺលើសឈាម ទឹកនោមផ្អែម បានមកសម្រាកព្យាបាលនៅមន្ទីរពេទ្យបង្អែក ស្រុកស្វាយទាបជាមួយគ្នា៕
