(កណ្តាល)៖ បុរសម្នាក់ ដែលគេស្គាល់ថា ជាមេភូមិបានខ្យល់គរស្លាប់ ខណៈចេញពីផ្ទះទៅលើកលប នាព្រឹកព្រលឹមថ្ងៃទី២៥ ខែមករាឆ្នាំ២០១៦នេះ ត្រង់ចំណុចភូមិពាមរាំងក្រោម ឃុំពាមរាំង ស្រុកលើកដែក ខេត្តកណ្តាល។ តាមសំដីមន្ត្រីប៉ូលីសស្រុកលើកដែក បានប្រាប់ឲ្យដឹងថា លោកមេភូមិដែលត្រូវខ្យល់គស្លាប់នោះ មានឈ្មោះ ឆឹង គឹមស្រ៊ី ភេទប្រុស មុខរបរជាមេភូមិ និងមានទីលំនៅភូមិព្រែកឫស្សី ឃុំកំពង់កុង ស្រុកលើកដែក ខេត្តកណ្តាល។
ប្រពន្ធបុរសរងគ្រោះបានរៀបរាប់ប្រាប់ថា នៅមុនពេលកើតហេតុ ម៉ោងប្រមាណជា៦ព្រឹក គឺប្តីរបស់គាត់ចេញទៅលើកលប នៅចំណុចកើតហេតុដូចសព្វមួយដងមិនដែលមានបញ្ហាអ្វីនោះទេ តែស្រាប់តែនៅព្រឹកនេះ ប្តីរបស់គាត់កំពុងតែឈរលើទូក រៀបឱនលើកលប ក៏ស្រាប់តែដាំដូងផ្កាប់មុខធ្លាក់ចូល ទៅក្នុងទឹកបណ្តាលឲ្យ ឈ្លក់ទឹកស្លាប់តែម្តងទៅ។
បន្ទាប់មកគ្រួសារជនរងគ្រោះ បានផ្តល់ដំណឹងនេះទៅឲ្យខាងកម្លាំងមន្ត្រី ជំនាញចុះមកពិនិត្យលើសព ហើយមន្ត្រីជំនាញ បានពិនិត្យរួច និងបានបញ្ជាក់ប្រាប់ថា លោកមេភូមិពិតជាស្លាប់ ដោយសារខ្យល់គ ពិតប្រាកដមែន ហើយសពត្រូវបានប្រគល់ទៅឲ្យក្រុមគ្រួសារ យកទៅធ្វើបុណ្យតាមប្រពៃណី៕
