(បាត់ដំបង)៖ រដ្ឋបាលខេត្តបាត់ដំបងនាព្រឹកថ្ងៃទី២៤ ខែកក្កដា ឆ្នាំ២០២០ បានរៀបចំពិធីប្រកាសចូលកាន់មុខតំណែងប្រធានមន្ទីរវប្បធម៌ និងវិចិត្រសិល្បៈខេត្តបាត់ដំបង ដោយលោក គឹម សោភ័ណ ត្រូវបានតែងតាំងជាប្រធានថ្មីជំនួសលោកស្រី កែវ សុភាព ដែលត្រូវបានចូលនិវត្តន៍។
ពិធីនេះបានធ្វើឡើងក្រោមវត្តមានលោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងលោក អ៊ុយ រី ប្រធានក្រុមប្រឹក្សាខេត្ត, លោក ងួន រតនៈ អភិបាលខេត្តព្រមទាំងមានការ ចូលរួមពីសមាជិកក្រុមប្រឹក្សាខេត្ត គណៈអភិបាលខេត្ត ប្រធានមន្ទីរ អង្គភាពរដ្ឋនានាជុំវិញខេត្ត លោកអភិបាលក្រុង ស្រុក មន្រ្តីរាជការចូលរួមជិត ២០០នាក់។
អភិបាលខេត្ត បានអបអរសាទរប្រធាមន្ទីរវប្បធម៌ និងវិចិត្រសិល្បៈថ្មីខេត្ត និងបានណែនាំឲ្យមានសាមគ្គីភាពផ្ទៃក្នុងបានល្អ និងមានកិច្ចសហការជាមួយមន្ទីរនានាជុំវិញខេត្ត ពិសេសរដ្ឋបាលខេត្តមានការគាំទ្រទាំងស្រុង និងបន្តខិតខំប្រឹងប្រែងធ្វើការជំនាញបន្ថែមទៀតឲ្យបានល្អប្រសើ។
លោកស្រីរដ្ឋមន្រ្តី បានបញ្ជាក់ថា ទឹកដីខេត្តបាត់ដំបង មានប្រសាទតូចធំច្រើនដែរ ដែលបុព្វបុរសដូនតាខ្មែរបន្សល់ទុកឲ្យកូនចៅជំនាន់ក្រោយ បានស្គាល់ និងបានយល់ពីវប្បធម៌ខ្មែររបស់ខ្លួន ខណៈដែលខេត្តបាត់ដំបងសម្បូរណ៍ទៅដោយតំបន់ទេសចរណ៍ធម្មជាតិ និងរម្មណីយ៍ដ្ឋានកែច្នៃជាច្រើនទៀត។
លោកស្រី ភឿង សកុណា បានផ្តាំផ្ញើប្រធានមន្ទីរថ្មី ដែលទើបបានប្រកាសតែតាំងថ្មី និងខិតខំធ្វើការជំនាញរបស់ខ្លួនឲ្យល្អដោយមានកិច្ចសហការជាមួយរដ្ឋបាលខេត្ត និងមន្ទីរជំនាញនានាពាក់ព័ន្ធ ក្នុងខេត្តមេត្តាជួយថែរក្សាអភិរក្សវត្ថុបុរាណ ប្រសាទបុរាណ ផ្ទះបុរាណជាបេតិកភ័ណ្ឌជាតិជាដើមផងដែរ៕
