(ភ្នំពេញ)៖ លោកស្រី អាន ផល្លា និងលោកស្រី សួស សូលីដា ដែលជាអនុប្រធានកិត្តិយស អនុសាខាកាកបាទក្រហមកម្ពុជា ខណ្ឌប្ញស្សីកែវ នៅតែបន្តសកម្មភាព ក្នុងការដឹកនាំក្រុមការងារ ចុះចែកអំណោយជាគ្រឿងឧបភោគបរិភោគ និងថវិកាដល់ប្រជាពលរដ្ឋងាយរងគ្រោះ ចំនួន១២គ្រួសារទៀត ដើម្បីជួយសម្រួលដល់ជីវភាពរស់នៅប្រចាំថ្ងៃ នៅកំលុងពេលដែលជម្ងឺកូវីដ១៩ កំពុងតែរាតត្បាតលើពិភពលោក និងបានកើតឡើងនៅកម្ពុជា។
សកម្មភាពមនុស្សធម៌របស់អនុប្រធានកិត្តិយស អនុសាខាកាកបាទក្រហមកម្ពុជា ខណ្ឌប្ញស្សីកែវ ដែលបានរៀបចំធ្វើឡើងជាបន្តបន្ទាប់ ស្ថិតនៅសង្កាត់ទួលសង្កែទី១ និងសង្កាត់ទួលសង្កែទី២ នាថ្ងៃទី២០-២១ ខែកក្កដា ឆ្នាំ២០២០ ពោលគឺរយៈពេល២ថ្ងៃជាប់គ្នានេះ គឺនៅក្រោយពីក្រុមការងារដែលដឹកនាំដោយលោកស្រី អាន ផល្លា និងលោកស្រី សួស សូលីដា ដដែលនេះ ឧបត្ថម្ភគ្រឿងឧបភោគបរិភោគ និងថវិកាដល់ប្រជាពលរដ្ឋងាយរងគ្រោះ ចំនួន១០គ្រួសារផ្សេងទៀត ស្ថិតនៅសង្កាត់ស្វាយប៉ាក និងសង្កាត់ច្រាំងចំរេះទី២ កាលពីថ្ងៃទី១៣ និងថ្ងៃទី១៥ ខែកក្កដា ឆ្នាំ២០២០។
សកម្មភាពមនុស្សធម៌ របស់អនុប្រធានកិត្តិយសអនុសាខាកាកបាទក្រហមកម្ពុជាខណ្ឌឫស្សីកែវនេះដែរ, លោកស្រី អាន ផល្លា ក៏បាននាំនូវការផ្តាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលសម្ដេចទាំងទ្វេរ តែងតែគិតគូរពីសុខទុក្ខ របស់ប្រជាពលរដ្ឋក្រីក្រ ដោយមិនប្រកាន់ពូជសាសន៍ ពណ៌សម្បុរ ឬនិន្នាការនយោបាយឡើយ។
លើសពីនេះ លោកស្រីអនុប្រធានកិត្តិយសអនុសាខាកាកបាទក្រហមកម្ពុជាខណ្ឌឫស្សីកែវទាំង២ ក៏បានលើកឡើងផងដែរថា ចំពោះអំណោយមានជាគ្រឿងឧបភោគបរិភោគ និងថវិកាដែលក្រុមការងារ អនុសាខាកាកបាទក្រហមកម្ពុជាខណ្ឌ បាននាំមកឧបត្ថម្ភជូននៅពេលនេះ គឺសម្រាប់ចែកជូនចំពោះ តែប្រជាពលរដ្ឋ មានជីវភាពខ្វះខាតប៉ុណ្ណោះ ដូចជាជនគ្មានទីពឹង ជនចាស់ជរា អ្នកកើតជំងឺរ៉ាំរៃ ឬមានផ្ទុកមេរោគជាដើម ដែលជាការចង្អុលបង្ហាញចំគោលដៅ ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
នាឱកាសប្រគល់ និងទទួលអំណោយមនុស្សធម៌ តាមរយៈអនុសាខាកាកបាទក្រហមកម្ពុជា សង្កាត់-ខណ្ឌ ដឹកនាំដោយលោកស្រី អាន ផល្លា និងលោកស្រី សួស សូលីដា ជាមួយសហការីនេះផងដែរ, ប្រជាពលរដ្ឋបានថ្លែងអំណរគុណយ៉ាងជ្រាលជ្រៅបំផុត ជូនចំពោះសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានយកចិត្តទុកដាក់ជួយដល់ពួកគាត់កំពុងជួបបញ្ហាខ្វះខាត ក្នុងជីវភាពរស់នៅប្រចាំថ្ងៃ និងជាកំលុងពេលជម្ងឺកូវីដ១៩ កំពុងតែរីករាតត្បាត។
សូមជម្រាបថា នូវកំលុងពេលជម្ងឺកូវីដ១៩ កំពុងតែរាតត្បាតលើពិភពលោក, អនុប្រធានកិត្តិយសអនុសាខាកាកបាទក្រហមកម្ពុជាខណ្ឌប្ញស្សីកែវ ដឹកនាំដោយលោកស្រី អាន ផល្លា និងលោកស្រី សួស សូលីដា តំណាងលោក ជា ពិសី ប្រធានកិត្តិយសអនុសាខាកាកបាទក្រហមកម្ពុជាខណ្ឌ នៅតែបន្តសកម្មភាពក្នុងការចុះសួរសុខទុក្ខ និងចែកអំណោយជាគ្រឿងឧបភោគបរិភោគ និងថវិកាមួយចំនួន ដល់ប្រជាពលរដ្ឋជាជនពិការខ្វះខាតដែលងាយរងគ្រោះចំនួន១០រួសារ ស្ថិតនៅសង្កាត់ស្វាយប៉ាក និងនៅសង្កាត់ច្រាំងចំរេះទី២ កាលពីថ្ងៃទី១៣-១៥ ខែកក្កដា ឆ្នាំ២០២០ នៅមុនពេលក្រុមការងារដែលដឹកនាំដោយអនុប្រធានកិត្តិយសអនុសាខាកាកបាទក្រហមកម្ពុជាខណ្ឌប្ញស្សីកែវ ឧបត្ថម្ភគ្រឿងបរិភោគ និងថវិកាជូនប្រជាពលរដ្ឋងាយរងគ្រោះ ចំនួន១២គ្រួសារផ្សេងទៀត ដើម្បីជួយសម្រួលដល់ជីវភាពរស់នៅប្រចាំថ្ងៃ នៅកំលុងពេលដែលជម្ងឺកូវីដ១៩ កំពុងតែរាតត្បាតលើពិភពលោក និងបានកើតឡើងនៅកម្ពុជា ស្ថិតនៅសង្កាត់ទួលសង្កែទី១ និងសង្កាត់ទួលសង្កែទី២ នាថ្ងៃទី២០-២១ ខែកក្កដា ឆ្នាំ២០២០៕
