(ត្បូងឃ្មុំ)៖ លោក ថោ ជេដ្ឋា រដ្ឋលេខាធិការក្រសួងធនធានទឹក និងឧតុនិយម កាលពីថ្ងៃទី១៩ ខែមករា ឆ្នាំ២០១៦ បានដឹកនាំក្រុមការងារក្រសួង រួមនឹងមន្ទីរធនធានទឹក និងឧតុនិយមខេត្តត្បូងឃ្មុំ ចុះពិនិត្យការងារអន្តរាគមន៍បូមទឹក ផ្គត់ផ្គង់ដំណាំកសិឧស្សាហកម្ម និងដំណាំរួមផ្សំ របស់បងប្អូនប្រជាកសិករ ស្ថិតក្នុងឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ។
ថ្លែងនៅក្នុងឱកាសចុះពិនិត្យការងារ លោករដ្ឋលេខាធិការ បានមានប្រសាសន៍ថា សម្រាប់ខេត្តត្បូងឃ្មុំ បើនិយាយអំពីដំណាំស្រូវ ទាំងស្រូវប្រាំង និងស្រូវវស្សា គឺក្រសួងបានជួយអន្តរាគមន៍រួចរាល់អស់ហើយ ដោយស្រូវវស្សា ត្រូវបានប្រជាកសិករប្រមូលផលរួចរាល់ជាស្ថាពរ ឯស្រូវប្រាំង ក៏កំពុងចាប់ផ្តើមប្រមូលផលជាបណ្តើរៗ និងមិនមានបញ្ហាប្រឈមនឹង កង្វះខាតទឹកទៀតទេ។ អ្វីដែលក្រសួងនៅបន្តអន្តរាគមន៍ ជួយដល់បងប្អូនប្រជាកសិករនាពេលនេះ គឺផ្តោតទៅលើដំណាំកសិឧស្សាហកម្ម និងដំណាំរួមផ្សំ មានដូចជាថ្នាំជក់ ពោត..ជាដើម។
លោករដ្ឋលេខាធិការ បន្តថា តាមរយៈការបូមទឹកផ្គត់ផ្គង់ ដែលមានរយៈពេលប្រមាណជា ៤សប្តាហ៍កន្លងមកនេះ ឃើញថា ដំណាំកសិឧស្សាហកម្ម ក៏ដូចជាដំណាំរួមផ្សំផ្សេង របស់បងប្អូនប្រជាកសិករ ប្រមាណជិត៧០០ហិកតា ស្ថិតក្នុងឃុំរការខ្នុរ កំពុងមានការលូតលាស់យ៉ាងល្អ។ បើទោះបីនេះមិនមែន ជាការងារស្នូលរបស់ក្រសួង ប៉ុន្តែដោយយោងទៅលើស្ថានភាពអាកាសធាតុ និងទឹកទន្លេ នាឆ្នាំ ២០១៥ កន្លងមក ព្រមទាំងសំណូមពររបស់ បងប្អូនប្រជាកសិករផងនោះ ក្រុមការងាររបស់យើងនឹងបន្តបូម ជួយដល់ពួកគាត់រហូតដល់ផ្ទៃដីដំណាំទាំងនោះ លែងមានតម្រូវការទឹក៕
