(ភ្នំពេញ)៖ រដ្ឋមន្ដ្រីក្រសួងសុខាភិបាល លោកសាស្ដ្រាចារ្យ ម៉ម ប៊ុនហេង នៅព្រឹកថ្ងៃទី២៥ ខែមិថុនា ឆ្នំា២០២០នេះ បានអញ្ជើញក្នុងពិធីប្រកាសចូលកាន់តំណែងថ្មី របស់ប្រធានមជ្ឈមណ្ឌលជាតិគាំពារមាតា និងទារក។
ក្នុងឱកាសនោះ លោកសាស្ដ្រាចារ្យ ម៉ម ប៊ុនហេង បានប្រគល់អនុក្រិត និងត្រា ជូនលោកស្រីវេជ្ជបណ្ឌិត គឹម រ័ត្ននា បានចូលកាន់តំណែងថ្មីប្រធានមជ្ឈមណ្ឌលជាតិគាំពារមាតា និងទារក ជំនួសលោកស្រីសាស្ដ្រាចារ្យ ទុង រដ្ឋាវី ដែលត្រូវបានចូលនិវត្ដ ន៍។
ទន្ទឹមនឹងនោះ រដ្ឋមន្ដ្រី ម៉ម ប៊ុនហេង បានថ្លែងថា «មជ្ឈមណ្ឌលជាតិគាំពារមាតា និងទារក ជាមជ្ឈមណ្ឌលមួយជាមូលដ្ឋានសំខាន់ក្នុងការងារប្រតិបត្ដិ និងដឹកនាំកម្មវិធីជាតិ ហើយក៏ជាមជ្ឈមណ្ឌលបណ្ដុះបណ្ដាលធនធានមនុស្សផង។ ដូច្នេះ ត្រូវខិតខំរួមគ្នា ផ្ដល់សេវាដល់ស្រ្ដី មាតា និងទារក ដើម្បីកាត់បន្ថយអត្រាមរណៈភាពមាតាកុមារ និងទារក ដែលទើបនឹងកើត ជាពិសេសកុមារដែលមានហានិភ័យខ្ពស់ប្រមាណ៣០%»។
ជាមួយគ្នានោះ រដ្ឋមន្ដ្រីសុខាភិបាល បានជំរុញលើកទឹកចិត្ដដល់ប្រធានថ្មី ត្រូវយកចិត្ដទុកដាក់ និងទំនួលខុសត្រូវខ្ពស់ ក្នុងការគ្រប់គ្រងការងារឱ្យមានដំណើរការល្អ ចៀសវាងពេលមានបញ្ហារត់គេច ត្រូវសាមគ្គី រួមកម្លាំងគ្នាដោះស្រាយ និងផ្ដល់មតិយោបល់ប្រកបដោយប្រសិទ្ធិភាពខ្ពស់៕
