(អង់គ្លេស)៖ យោងតាមការចេញផ្សាយរបស់សារព័ត៌មាន Mail Online នៅល្ងាចថ្ងៃទី១៩ ខែមករា ឆ្នាំ២០១៦នេះ បានឲ្យដឹងថា សាលារៀនជាច្រើនកន្លែង ក្នុងតំបន់ West Midlands ចក្រភពអង់គ្លេស ត្រូវបានបិទ ព្រមទាំងបានធ្វើការជម្លៀស កូនសិស្សរាប់ពាន់នាក់ចេញ ទៅរកទីមានសុវត្ថិភាព​ បន្ទាប់ពីទទួលបាន ការគំរាមបំផ្ទុះគ្រាប់បែក។

សិស្សសាលាចំនួន៣កន្លែង នៅតំបន់ Sandwell និងមួយកន្លែងទៀត នៅតំបន់ Dudley បានជម្លៀសចេញ ដោយសារតែមានការភ័យខ្លាចផ្នែកសន្តិសុខ បន្ទាប់ពីទទួលបានការគំរាមកំហែង​តាមរយៈទូរស័ព្ទ។ សាលារៀនទាំង៤ ដែលទទួលបាន ការគំរាមបំផ្ទុះគ្រាប់បែកនោះ មានឈ្មោះ សាលា Bristnall Hall Academy, Oldbury Academy និង Holly Lodge នៅតំបន់ Oldbury និងសាលា Leasowes School នៅតំបន់ Halesowen។

ការហៅទូរស័ព្ទគំរាមបំផ្ទុះគ្រាប់បែកនេះ ត្រូវបានធ្វើឡើងនៅចម្លោះម៉ោង ៩៖០០នាទី ដល់ ម៉ោង៩៖៣០នាទីព្រឹក (ម៉ោងក្នុងតំបន់) ដោយនៅពេលនេះ ប៉ូលិសកំពុងធ្វើការស៊ើបអង្កេត ដើម្បីស្វែងរកមនុស្ស ដែលធ្វើការទូរស័ព្ទគំរាមនេះ៕