(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅព្រឹកថ្ងៃទី២៤ ខែមិថុនា ឆ្នាំ២០២០នេះ បានបញ្ជាក់ថា រាជរដ្ឋាភិបាល ចំណាយថវិកាប្រមាណ ២៥លានដុល្លារ ក្នុងមួយខែដើម្បីជួយដល់ប្រជាពលរដ្ឋដែលជួបការខ្វះខាតដោយសារជំងឺ COVID-19។ ចំនួននេះគ្រាន់តែជាការចាប់ផ្ដើមប៉ុណ្ណោះ ពោលប្រសិនបើជំងឺនេះនៅបន្ដអូសបន្លាយ ការចំណាយអាចកើនដល់៣០លានដុល្លារ ឬលើសពីនេះ។

ក្នុងពិធីប្រកាសអនុវត្តន៍កម្មវិធីផ្តល់សាច់ប្រាក់ជូនប្រជាពលរដ្ឋ មានជីវភាពក្រីក្រ និងងាយរងគ្រោះដោយសារជំងឺកូវីដ១៩ ប្រមាណ៦០ម៉ឺនគ្រួសារ សម្ដេចតេជោ ហ៊ុន សែន បានអះអាងថា រហូតមកដល់ពេលនេះ រាជរដ្ឋាភិបាល បានបញ្ជូនសាច់ប្រាក់រួចរាល់ហើយ ចំនួន១២៥លានដុល្លារអាមេរិក ទៅកាន់គោលដៅនានា សម្រាប់រយៈពេល៥ខែ ដើម្បីជួយដល់ប្រជាពលរដ្ឋ។

សម្ដេចតេជោ ហ៊ុន សែន មានប្រសាសន៍យ៉ាងដូច្នេះថា «ឥលូវនេះខ្ញុំគិតថា ក្នុងមួយខែយើងចំណាយត្រឹមតែ២៥លានដុល្លារអាមេរិកប៉ុណ្ណោះ តែប្រសិនបើទំហំ នៃការរីកនៃចំនួនអ្នកក្រីក្រ គឺយើងអាចឈានទៅចាយ៣០លានដុល្លារ ឬលើស៣០លានដុល្លារថែមទៀត តែយើងត្រូវតែប្រឹងដើម្បីធានាថា ប្រជាជនកម្ពុជាយើង គ្មានប្រជាជនណាម្នាក់ដែលអត់ឃ្លាន ដាច់បាយ រហូតដល់ស្លាប់ដែលយើងមិនបានដឹង និងមិនបានដោះស្រាយនោះទេ»។

បើតាមប្រសាសន៍របស់សម្ដេចតេជោនាយករដ្ឋមន្ដ្រី អ្វីដែលរាជរដ្ឋាភិបាលកំពុងអនុវត្តនេះ គឺជាជំនួយសង្គម ក្នុងពេលមានវិបត្តិ តែមិនមែនជាការចិញ្ចឹមរបស់រដ្ឋ ជាអចិន្ដ្រៃយ៍នោះទេ។ សម្ដេចសង្កត់ធ្ងន់ថា ពាក់ព័ន្ធករណីនេះ មនុស្សមួយចំនួនបាននិយាយអុចអាល និងសម្ដែងការមិនយល់ ប៉ុន្ដែសម្ដេចថា ពួកគេល្មមចូលសាលា ដើម្បីរៀនសូត្រ និងយល់ដឹងថា អ្វីដែលជាចិញ្ចឹម និងអ្វីទៅដែលហៅថាជំនួយសង្គម។

បន្ថែមពីនេះ សម្ដេចតេជោ ហ៊ុន សែន ក៏បានបញ្ជាក់អំពីការទទួលបានសាច់ប្រាក់ឧបត្ថម្ភដែលថា បើទោះបីក្នុងមួយគ្រួសារ ដែលមានប័ណ្ណសមធម៌ ទោះសមាជិកតិច ឬច្រើន គឺត្រូវទទួលបានស្មើៗគ្នា ចំនួន១២ម៉ឺនរៀល សម្រាប់អ្នករស់នៅទីប្រជុំជនក្នុងរាជធានីភ្នំពេញ ឬទីប្រជុំជនក្រៅរាជធានីភ្នំពេញ និង៨ម៉ឺនរៀល ក្នុងមួយគ្រួសារ សម្រាប់អ្នករស់នៅជនបទ។ ក្រៅពីនេះ ក៏មានការឧបត្ថម្ភសម្រាប់សមាជិកគ្រួសារម្នាក់ នៅតាមអ្វីដែលបានកំណត់ផងដែរ។

សម្ដេចតេជោ នាយករដ្ឋមន្ដ្រីបានពន្យល់អំពីការទទួលបានសាច់ប្រាក់ឧបត្ថម្ភនេះដូចខាងក្រោម៖

ទី១៖ សម្រាប់គ្រួសារក្រីក្រ និងងាយរងគ្រោះ នៅទីប្រជុំជនក្នុងរាជធានីភ្នំពេញ
* គ្រួសារមានប័ណ្ណសមធម៌ (ប្រភេទ១ និងប្រភេទ២) ទទួលបាន១២ម៉ឺនរៀល
* សមាជិកគ្រួសារម្នាក់ៗ ទទួលបាន៥២,០០០រៀល (ក្រីក្រ១) និង៣៦,០០០រៀល (ក្រីក្រ២)
* កុមារអាយុក្រោម៥ឆ្នាំម្នាក់ ទទួលបាន ៤០,០០០រៀល (ក្រីក្រ១) និង២៨,០០០រៀល (ក្រីក្រ២)
* ជនមានពិការភាពម្នាក់ ទទួលបាន៤០,០០០រៀល (ក្រីក្រ១) និង២៨,០០០រៀល (ក្រីក្រ២)
* មនុស្សចាប់អាយុចាប់ពី៦០ឆ្នាំម្នាក់ ទទួលបាន៤០,០០០រៀល (ក្រីក្រ១) និង២៨,០០០រៀល (ក្រីក្រ២)
* គ្រួសារក្រីក្រដែលមានសមាជិកផ្ទុកមេរោគអេដស៍ ទទួលបាន៤០,០០០រៀល (ក្រីក្រ១) និង២៨,០០០រៀល (ក្រីក្រ២)

ទី២៖ សម្រាប់គ្រួសារក្រីក្រ និងងាយរងគ្រោះ នៅទីប្រជុំជនក្រៅពីរាជធានីភ្នំពេញ
* គ្រួសារមានប័ណ្ណសមធម៌ (ប្រភេទ១ និងប្រភេទ២) ទទួលបាន១២ម៉ឺនរៀល
* សមាជិកគ្រួសារម្នាក់ៗ ទទួលបាន៥២,០០០រៀល (ក្រីក្រ១) និង២៨,០០០រៀល (ក្រីក្រ២)
* កុមារអាយុក្រោម៥ឆ្នាំម្នាក់ ទទួលបាន ៤០,០០០រៀល (ក្រីក្រ១) និង២៨,០០០រៀល (ក្រីក្រ២)
* ជនមានពិការភាពម្នាក់ ទទួលបាន៤០,០០០រៀល (ក្រីក្រ១) និង២៨,០០០រៀល (ក្រីក្រ២)
* មនុស្សចាប់អាយុចាប់ពី៦០ឆ្នាំម្នាក់ ទទួលបាន៤០,០០០រៀល (ក្រីក្រ១) និង២៨,០០០រៀល (ក្រីក្រ២)
* គ្រួសារក្រីក្រដែលមានសមាជិកផ្ទុកមេរោគអេដស៍ ទទួលបាន៤០,០០០រៀល (ក្រីក្រ១) និង២៨,០០០រៀល (ក្រីក្រ២)

ទី៣៖ សម្រាប់គ្រួសារក្រីក្រ និងងាយរងគ្រោះ នៅជនបទ
* គ្រួសារមានប័ណ្ណសមធម៌ (ប្រភេទ១ និងប្រភេទ២) ទទួលបាន៨ម៉ឺនរៀល
* សមាជិកគ្រួសារម្នាក់ៗ ទទួលបាន២៤,០០០រៀល (ក្រីក្រ១) និង១៦,០០០រៀល (ក្រីក្រ២)
* កុមារអាយុក្រោម៥ឆ្នាំម្នាក់ ទទួលបាន២៤,០០០រៀល (ក្រីក្រ១) និង១៦,០០០រៀល (ក្រីក្រ២)
* ជនមានពិការភាពម្នាក់ ទទួលបាន២៤,០០០រៀល (ក្រីក្រ១) និង១៦,០០០រៀល (ក្រីក្រ២)
* មនុស្សចាប់អាយុចាប់ពី៦០ឆ្នាំម្នាក់ ទទួលបាន២៤,០០០រៀល (ក្រីក្រ១) និង១៦,០០០រៀល (ក្រីក្រ២)
* គ្រួសារក្រីក្រដែលមានសមាជិកផ្ទុកមេរោគអេដស៍ ទទួលបាន២៤,០០០រៀល (ក្រីក្រ១) និង១៦,០០០រៀល (ក្រីក្រ២)

បន្ថែមពីនេះ សម្ដេចតេជោ ហ៊ុន សែន បានអះអាងថា មិនយូរប៉ុន្មានទេទឹកប្រាក់ទាំងអស់នោះ នឹងបើកទៅដល់ដៃប្រជាពលរដ្ឋ តាមរយៈធនាគារឯកទេសវីង ដែលមានស្ទើរគ្រប់ទីកន្លែងក្នុងប្រទេសកម្ពុជា៕