(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ បន្តបើកប្រាក់ឧបត្ថម្ភលើកទី៧ ជូនកម្មករ និយោជិតបម្រើការងារក្នុងវិស័យកាត់ដេរ និងវិស័យទេសចរណ៍ប្រមាណ ១២,៧៦០នាក់ មកពីសហគ្រាសចំនួន៣៤ ដែលត្រូវបានព្យួរការងារ។

លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់ Fresh News នៅថ្ងៃទី២៣ ខែមិថុនា ឆ្នាំ២០២០នេះថា មានកម្មករ និយោជិតសរុបប្រមាណ ១៦៩,១៦១នាក់ ដែលក្រសូងត្រូវបើកប្រាក់ឧបត្ថម្ភជូនក្នុងរយៈពេល៧លើកនេះ។ ក្នុងនោះមានថវិកាសរុបប្រមាណ ១៥,៩២០,៤៧៥,៥៣០រៀល ឬប្រហែលនឹង ៣,៩លានដុល្លារអាម៉េរិក ត្រូវបានរដ្ឋបើកឧបត្ថម្ភជូនកម្មករ និយោជិត ដែលត្រូវបានព្យួរការងារ។

រាជរដ្ឋាភិបាលបានសម្រេចបញ្ចេញថវិកាជាតិ បានសម្រេចបញ្ចេញកញ្ចប់ថវិកាជាតិ ដើម្បីដោះស្រាយការលំបាករបស់កម្មករ និយោជិតក្នុងវិស័យកាត់ដេរ និងទេសចរណ៍ ដែលត្រូវបានព្យួរការងារដោយសារតែវិបត្តិបណ្តាលមកពីជំងឺកូវីដ១៩។ លោក ហេង សួរ បានឱ្យដឹងថា ដោយសារការសុំព្យួរការងារមានរយៈពេលខុសៗគ្នា ការទទួលបានក៏ខុសៗគ្នា ការទទួលបានប្រាក់ឧបត្ថម្ភក៏ផ្សេងៗគ្នា អាស្រ័យលើការផ្តល់ឯកសារ និងព័ត៌មានគ្រប់របស់រោងចក្រសហគ្រាសនីមួយៗ។

លោក ហេង សួរ បានអះអាងថា ការព្យួរកិច្ចសន្យាការងាររយៈពេល ៧ថ្ងៃ ដល់ ១០ថ្ងៃ ទទួលបានប្រាក់ឧបត្ថម្ភប្រមាណ ១៥ដុល្លារ, ព្យួរកិច្ចសន្យាការងាររយៈពេល ១១ថ្ងៃ ដល់ ២០ថ្ងៃ ទទួលបានប្រាក់ឧបត្ថប្រមាណ ៣០ដុល្លារ ហើយសម្រាប់ការព្យួរកិច្ចសន្យាការងាររយៈពេល ២១ថ្ងៃ ដល់ ១ខែ ទទួលបានប្រាក់ឧបត្ថម្ភ ៤០ដុល្លារ។

ការផ្តល់ប្រាក់ឧបត្ថម្ភនេះ ធ្វើឡើងតាមរយៈធនាគារឯកទេសវីង។ លោក ហេង សួរ បានឱ្យដឹងថា កន្លងទៅមានកម្មករ និយោជិតមួយចំនួនមានការផ្លាស់ប្តូរលេខទូរស័ព្ទ បានធ្វើឱ្យខកខានមិនបានទទួលសារពីធនាគារឯកទេសវីង។ ទន្ទឹមនឹងនេះក៏មានអ្នកខ្លះបាត់អត្តសញ្ញាណប័ណ្ណសញ្ជាតិខ្មែរដែលត្រូវទៅបញ្ជាក់ពីសមត្ថកិច្ច ទើបអាចបើកប្រាក់ឧបត្ថម្ភនេះពីភ្នាក់ងារវីងបាន។

លោក ហេង សួរ បានបញ្ជាក់ថា ករណីខកខាននេះ មានចំនួនតិចតួច ហើយក្រសួងក៏បានសហការគ្នាដោះស្រាយបានដោយរលូនផងដែរ។ លោករដ្ឋលេខាធិការរូបនេះ បានអះអាងថា ក្រសួងការងារនិងបណ្តុះបណ្តាលវិជ្ជាជីវៈ និងក្រសួងសេដ្ឋកិច្ច និងហិរញ្ញវត្ថុ នឹងបន្តសហការគ្នាជាមួយភាគីពាក់ព័ន្ធដើម្បីជំរុញការបើកផ្តល់ប្រាក់ឧបត្ថម្ភនេះឱ្យកាន់តែរលូនថែមទៀត។

បើតាមលោក ហេង សួរ បានឱ្យដឹងថា ធនាគារឯកទេសវីង នឹងបង្វិលប្រាក់ឧបត្ថម្ភជូនរាជរដ្ឋាភិបាលវិញ ប្រសិនជាកម្មករ និយោជិត ខកខានមិនបានទៅបើកប្រាក់ឧបត្ថម្ភនេះក្នុងរយៈពេល ១០ថ្ងៃ បន្ទាប់ពីទទួលបានសារតាមទូរសព្ទពីធនាគារឯកទេសវីង។

លោក ហេង សួរ បានរំលឹកថា ដើម្បីបើកប្រាក់ឧបត្ថម្ភនេះ កម្មករ និយោជិត ត្រូវយកអត្តសញ្ញាណបណ្ណសញ្ជាតិខ្មែរ និងទូរសព្ទដែលទទួលបានសារនោះទៅកាន់ភ្នាក់ងារវីង ដែលនៅជិតបំផុត។ ការបើកប្រាក់ឧបត្ថម្ភនេះ មិនតម្រូវឱ្យបង់ថ្លៃសេវាទៅភ្នាក់ងារវីងឡើយ។

លោក ហេង សួរ បានអំពាវនាវទៅដល់កម្មករ និយោជិត ដែលបម្រើការងារនៅរោងចក្រ សហគ្រាស ដែលមិនបានទទួលសារទូរសព្ទពីធនាគារឯកទេសវីង សូមទាក់ទងសួរព័ត៌មានបន្ថែម ឬធ្វើបច្ចុប្បន្នភាពលេខទូរសព្ទរបស់ខ្លួន ទៅរដ្ឋបាលរោងចក្រ សហគ្រាសរបស់ខ្លួន៕