(ប៉ៃលិន)៖ លោកស្រី គង់ ស្តី កើត សុធា លោកស្រី ជា លាប អភិបាលរងខេត្តប៉ៃលិន រួមដំណើដោយក្រុមការងារ ជាច្រើននាក់ទៀត បានចុះសាកសួរសុខទុក្ខ និងនាំយកសំភារៈ ព្រមទាំងថវិកា ទៅចែកជូនដល់បងប្អូន ប្រជាពលរដ្ឋដែលខ្វះខាតស្បៀងចំនួន ៣១គ្រួសារ ស្ថិតនៅភូមិក្រចាប់លើ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

លោកស្រី ជា លាប បានថ្លែងថា កន្លងមកថ្នាក់ដឹកនាំខេត្តប៉ៃលិន តែងតែចុះសាកសួរសុខទុក្ខ និងគិតគូការលំបាក របស់បងប្អូនប្រជាពលរដ្ឋ នៅទូទាំងខេត្ត ដោយបានសហការជាមួយ​អាជ្ញាធរ​មូលដ្ឋាន ស្រង់ឈ្មោះគ្រួសារប្រជាពលរដ្ឋ ដែលខ្វះខាតស្បៀង ដើម្បីនាំយក ថវិកា សំភារៈគ្រឿងឧបភោគ បរិភោគ ដើម្បីចែកជូនបងប្អូន បានទាន់ពេលវេលា ដោយមិនឲ្យប្រជាពលរដ្ឋណាម្នាក់ ដាច់បាយស្លាប់មិនបានដឹងនោះទេ។ ជាក់ស្តែង នាពេលនេះ គ្រាន់តែទទួលដំណឹង អាជ្ញាធរថ្នាក់មូលដ្ឋានភ្លាមលោក កើត សុធា អភិបាលខេត្តប៉ៃលិន បានចាត់តាំងក្រុមការងារ ថ្នាក់ដឹកនាំខេត្តនាំយក សំភារៈ ថវិកាទៅចែកជូនដល់លំនៅដ្ឋានរបស់បងប្អូនភ្លាម បើទោះបីសំភារៈ ទាំងនេះមិនអាចឆ្លើយតបការខ្វះខាតគ្រប់ពេលក៏ពិតមែន តែវាអាចជួយដោះស្រាយ ជីវភាពបងប្អូនបានកំរិតផងដែរ។

លោកស្រីបានផ្តាំផ្ញើដល់ប្រជាពលរដ្ឋទាំងអស់ត្រូវតែចេះថែរក្សាអនាម័យ ក្នុងការរស់នៅប្រចាំថ្ងៃ ដោយរស់នៅស្អាត ហូបស្អាត ដើម្បីបញ្ចៀសកុំឲ្យមានជំងឺឆ្លងផ្សេងៗ ដែលតែងតែរាតត្បាត ពិសេស ជំងឺរាគរូស ជំងឺគ្រុនចាញ់ និងជំងឺគ្រុនឈាមជាដើម ហើយក្នុងករណីណាមានជម្ងឺសូមបងប្អូនទៅមន្ទីរពេទ្យ ឬមណ្ឌលសុខភាពដែលនៅជិតលំនៅដ្ឋានបងប្អូនដើម្បីព្យាបាលបន្ទាន់ ។ ទទឹ្ទមនឹងនេះ សូមបងប្អូនកុំធ្វើចំណាកស្រុក ទៅធ្វើការនៅក្រៅប្រទេសដោយខុសច្បាប់ ឲ្យសោះពីព្រោះនាំឲ្យមានគ្រោះថ្នាក់។ គួរបញ្ជាក់ថា អំណោយដែលចែកជូនដល់បងប្អូនប្រជាពលរដ្ឋខ្វះស្បៀងចំនួន ៣១គ្រួសារ ក្នុងមួយ គ្រួសារៗទទួលបាន អង្ករ ២៥គីឡូក្រាម  មី១កេះ ព្រមទាំងថវិការបស់លោកស្រី គង់ ស្តី កើត សុធា ក្នុង ១គ្រួសារទទួលបាន២ម៉ឺនរៀល។ 

ក្នុងឱកាសនោះដែរ  លោកស្រី គង់ ស្តី កើតសុធា និងក្រុមការងារ បាននាំយកអង្ក២៥ គីឡូក្រាម មី១កេះ និងថវិកា២ម៉ឺនរៀលជូនដល់លោកយាយ សុម ឆេង អាយុ៨៤ឆ្នាំ  និងជូន លោក ដុក ណុប អាយុ៤៦ រស់នៅភូមិភ្នំរាំង សង្កាត់អូតាវ៉ៅ ក្រុងប៉ៃលិន ខេត្តប៉ៃលិន ទទួលបានអង្គ២៥គីឡូក្រាម និងថវិកា ៥ម៉ឺនរៀលផងដែរ៕