(ភ្នំពេញ)៖ នៅថ្ងៃទី២២ ខែមិថុនា ឆ្នាំ២០២០ ដោយមានការបញ្ជាផ្ទាល់ពី លោក សុខ ពេញវុធ អភិបាលខណ្ឌដូនពេញ និងជាប្រធានគណៈបញ្ជាការឯកភាពខណ្ឌ, លោក យស យុទ្ធី, លោក ចាន់ គន្ថេត និងលោក ម៉ុក ច័ន្ទករុណា អភិបាលរងខណ្ឌ អមដោយលោក នី សាមិត្ត ប្រធានការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈខណ្ឌដូនពេញ លោក មុត ប៊ុនថន អនុប្រធានការិយាល័យ លោក ជួន ចិត្រ អធិការរងខណ្ឌ លោក គីម វុត្ថា ប្រធានផ្នែកប្រជាការពារខណ្ឌ លោក ម៉ៅ ពោធិ លោក កែម ហេង អនុប្រធានផ្នែកបានបន្តចុះរៀបចំសណ្តាប់ធ្នាប់ និងផ្សព្វផ្សាយវិធានការរបស់ក្រសួងសុខាភិបាលដើម្បីការពារកូវីដ១៩។

ក្រុមការងារបានរៀបចំបែងចែកកម្លាំងប្រជាការពារខណ្ឌជា០៣គោលដៅ ចូលរួមសហការជាមួយកម្លាំងអធិការដ្ឋានខណ្ឌ និងកម្លាំងអាវុធហត្ថខណ្ឌ៖ ១-សួនច្បារមុខវត្តបទុមវត្តី សង្កាត់ចតុមុខ ២-វេទិកាមុខព្រះបរមរាជវាំង សង្កាត់ជ័យជំនះ ៣-រមណីយដ្ឋានវត្តភ្នំ សង្កាត់វត្តភ្នំ ដើម្បីចុះទប់ស្កាត់ និងដោះស្រាយចំពោះបញ្ហាបាតុកម្ម កូដកម្ម ដោយសន្តិវិធី។

ជាមួយគ្នានេះក្រុមការងារ ក៏បានរៀបចំសណ្ដាប់ធ្នាប់ កាណូតទេសចរណ៍ និងសណ្តាប់ធ្នាប់តាមសួនច្បារមាត់ទន្លេ ហាមមិនឱ្យមានការចតចាប់ពីច្រាំងទន្លេមុខព្រះបរមរាជវាំង រហូតដល់ច្រាំងទន្លេសួន CDC។

ហើយបានរៀបចំសណ្តាប់ធ្នាប់តាមដងផ្លូវសាធារណៈមានដូចជា មហាវិថីព្រះមុនីវង្ស ព្រះនរោត្តម ព្រះសុរាម្រិត ព្រះសីហនុ ព្រះសុធារស ព្រះស៊ីសុវត្ថិ, ចុះប្រមូលសំរាមសេសសល់ និងបាញ់ទឹកលាងសំអាតតាមដងផ្លូវ និងដេប៉ូសំរាមបណ្តោះអាសន្នមានមហាវិថី ព្រះមុនីវង្ស ព្រះនរោត្តម ព្រះសុរាម្រិត ព្រះសីហនុ ៥១ ៦១ និងចុះត្រួតពិនិត្យ និងកាយសំរាមកកស្ទះតាមមាត់អណ្តូងលូ ក្នុងមូលដ្ឋានខណ្ឌ ក្រោយពេលមេឃភ្លៀង៕