(ព្រៃវែង)៖ ស្នងការនគរបាលខេត្តព្រៃវែង លោកឧត្តមសេនីយ៍ ស្រេង ជា បានប្រាប់អង្គភាព Fresh News នៅរសៀលថ្ងៃទី១៩ ខែមករា ឆ្នាំ២០១៦នេះថា លោកបានប្រគល់ភារកិច្ចជូន លោក សឿង សុខុម អធិការរងទទួលផែនព្រហ្មទណ្ឌជាអធិការស្តីទី ស្រុកស្វាយអន្ទរ ក្រោយអធិការចាស់ ត្រូវបានតុលាការឃុុំខ្លួន ដាក់ពន្ធនាគារ រឿងផ្ទុះអាវុធបណ្តាល​ឲ្យស្លាប់បុរសម្នាក់ ពេលចុះ​បង្ក្រាប​សង្វៀនជល់មាន់។

អតីតអធិការនគរបាលស្រុកស្វាយអន្ទរ ខេត្តព្រៃវែង លោក ពុំ កាន់ ត្រូវតុលាការឃុំខ្លួនដាក់ពន្ធនាគារ  នៅថ្ងៃទី១៦ ខែមករា ឆ្នាំ២០១៦នេះ ក្រោយបាញ់ស្លាប់បុរសម្នាក់ ពេលចុះបង្ក្រាប​សង្វៀនជល់មាន់ ។

បើតាមលោកឧត្តមសេនីយ៍ស្នងការ  នៅថ្ងៃទី១៤ ខែមករា ឆ្នាំ២០១៦ លោក ពុំ កាន់ អធិការនគរបាលស្រុក​ស្វាយអន្ទរ បានដឹកនាំកម្លាំងចុះបង្រ្កាបល្បែង​សុីសងខុសច្បាប់ (មានជល់មាន់ និងបៀរ ចាក់អាប៉ោង) ពេលនោះស្រាប់តែលោកដកកាំភ្លើង​ខ្លីពីចង្កេះបាញ់ឡើងលើ ប៉ុន្តមិនដឹងយ៉ាងមិច ស្រាប់តែគ្រាប់កាំភ្លើងនោះហោះ​ផ្លាត​ទៅត្រូវបុរសម្នាក់​ដែលកំពុងឈរកាន់កូន បណ្តាល​ឱ្យដួលសម្លាប់​មួយរំពេច ។

ការបង្ក្រាបល្បែងសុីសងខាងលើនេះ បានធ្វើឡើង នៅភូមិតងឡងទី៣ ឃុំព្រៃខ្លា ស្រុកស្វាយអន្ទរ ខេត្តព្រៃវែង ពេលនោះស្រាប់តែលោកអធិការ បានរាលកៃកាំភ្លើងខ្លី ផ្ទុះត្រូវបុរសម្នាក់​ដែលកំពុងឈរ​កាន់កូន បណ្តាលឱ្យដួលស្លាប់មួយរំពេច ។

ប្រជាពលរដ្ឋបានប្រាប់ថា បុរសម្នាក់ដែលត្រូវគ្រាប់កាំភ្លើងចំក្បាលនោះ ឈ្មោះកិត អីម អាយុ៣៨ឆ្នាំ មានទីលំនៅភូមិតងឡងទី៣ ឃុំព្រៃខ្លា និងប្រពន្ធឈ្មោះ សុឹម ម៉េង អាយុ៣៤ឆ្នាំ រស់ស្រុកជាមួយគ្នា។ បើតាមអ្នកភូមិ ខណៈដែលសមត្ថកិច្ចចុះទៅបង្រ្កាប ទីតាំងជល់មាន់ ពេលនោះអ្នកមើល​និងអ្នកលេង បាននាំគ្នារត់ចេញយ៉ាង​ប្រសេចប្រសាច រំពេចនោះស្រាប់តែស្នូរ​គ្រាប់កាំ​ភ្លើង១គ្រាប់​បានផ្ទុះបន្លើរឡើង បន្តិចក្រោយមកស្រាប់តែបុរសម្នាក់​បានដួលដេក​នឹងដីនៅក្នុងថ្លុកឈាម ក្រោយពីគ្រាប់កាំភ្លើងនោះ​បានហោះ​ទៅទម្លុះក្បាល​របស់គាត់ធ្លាយ​ពីម្ខាងទៅម្ខាង ។

ដោយឡែកប្រពន្ធបុរសរងគ្រោះពេលនោះបានស្រែកថា "ហេតុអីបាញ់ប្តី​ខ្ញុំអញ្ចឹង" ។ ប៉ុន្តែសមត្ថកិច្ចមិនបានឆ្លើយតបទេ ។ រីឯកូនតូចដែលត្រូវប្តីបីក្រកងនោះក៏​រងរបួសបន្តិចបន្តួចផងដែរ។

សម្រាប់ភរិយា និងកូនជនរងគ្រោះ ក៏បានទទួលថវិកា ចំនួន៥០មឺិនរៀល ពីស្នងការនគរបាលខេត្តកំពត លោកឧត្តមសេនីយ៍​ ម៉ៅ ច័ន្ទមធុរិទ្ធ និងឧកញ៉ា ជឹម សុខ ២០មឺុនរៀលផងដែរ៕